Búgin – Áýe shabýylyna qarsy qorǵanys áskerleri kúni
ASTANA.KAZINFORM - 1992 jylǵy 19 maýsymda Qorǵanys mınıstriniń dırektıvasy negizinde Áýe shabýylyna qarsy qorǵanys áskerleri quryldy, dep habarlaıdy QR Qorǵanys mınıstriginiń baspasóz qyzmeti.
Bul áskerler eldiń ákimshilik-saıası, ónerkásiptik-ekonomıkalyq ortalyqtaryn, Qarýly kúshterdiń toptaryn, mańyzdy áskerı jáne strategııalyq nysandardy avıatsııa men ushqyshsyz ushý apparattarynyń soqqylarynan qorǵaýǵa arnalǵan.
Bólimsheler zamanaýı zenıttik-zymyran keshenderimen jáne radıolokatsııalyq stantsııalarmen jabdyqtalǵan. Bul áýe keńistigin baqylaýdy jáne yqtımal qaýipterdi anyqtaýdy qamtamasyz etedi.
Áskerler úshin ofıtser kadrlardy daıarlaý Almaty qalasyndaǵy Radıoelektronıka jáne baılanys áskerı-ınjenerlik ınstıtýtynda júzege asyrylady. Áskerı qyzmetshilerdiń joǵary kásibı daıyndyǵy halyqaralyq oqý-jattyǵýlar barysynda birneshe ret dáleldendi.
Qazirde Áýe shabýylyna qarsy qorǵanys áskerleri tsıfrlyq tehnologııalar men avtomattandyrylǵan basqarý júıelerin belsendi engizip keledi. Bul sheshim qabyldaý jyldamdyǵyn arttyryp, bólimshelerdiń ózara is-qımylyn tıimdi úılestirýge jáne jaýyngerlik mindetterdi oryndaý sapasyn jaqsartýǵa múmkindik beredi.
2025 jyly Qaraǵandy oblysyndaǵy «Saryshaǵan» polıgonynda ótken «Jaýyngerlik dostastyq» halyqaralyq taktıkalyq oqý-jattyǵýy barysynda avtomattandyrylǵan basqarý júıesi alǵash ret synaqtan ótkizilip, óziniń tıimdiligin kórsetti. Oqý barysynda áýe nysandaryn anyqtaý jáne joıý algorıtmderi pysyqtaldy.
-Joǵary jaýyngerlik daıyndyq, áskerı qyzmetshilerdiń kásibıligi jáne zamanaýı tehnologııalardy engizý – memleket qorǵanys qabiletiniń negizgi tirekteri. Áýe shekaralaryn táýlik boıy kúzetetin áýe shabýylyna qarsy qorǵanys áskerleri el men azamattardyń qaýipsizdigin qamtamasyz etip keledi,-delingen habarlamada.
Osyǵan deıin merzimdi áskerı qyzmetten ótpegen azamattar áskerı mamandyq alyp, áskerı bılet ıelene alatyny týraly jazdyq.
