Búgin — Áýe qorǵanysy kúshteriniń kásibı merekesi
ASTANA. KAZINFORM —
18 tamyzda Ulttyq qaýipsizdik júıesi negizgi komponentteriniń biri — QR Qarýly kúshteri Áýe qorǵanysy kúshteriniń qurylǵanyna 27 jyl tolyp otyr. Bul týraly Qorǵanys mınıstrligi málim etti.
Búginde Qarýly kúshterdiń bul túri Qazaqstan áskeriniń qýatty, joǵary tehnologııalyq jáne utqyr quramdas bóligine aınalǵan. Olardyń quramyna Áýe shabýylyna qarsy qorǵanys áskerleri men Áskerı-áýe kúshteri kiredi. Olar áýe shebin senimdi qorǵaýdy, strategııalyq mańyzdy memlekettik, ákimshilik jáne áskerı obektilerdi búrkemeleýdi qamtamasyz etedi.
Qarýly kúshterdiń basqa túrleri men ásker tekterin avıatsııalyq qoldaý mindetterin oryndaıdy. Mamandardy daıarlaý beıindi áskerı oqý oryndarynda júrgiziledi. Aqtóbedegi Áýe qorǵanysy kúshteriniń áskerı ınstıtýty ushý jáne ınjenerlik-tehnıkalyq quramnyń mamandaryn, al Almaty qalasyndaǵy Radıoelektronıka jáne baılanys áskerı-ınjenerlik ınstıtýty Áýe shabýylyna qarsy qorǵanys jáne baılanys áskerleri úshin ınjenerlik kadrlar daıarlaıdy.
Áskerı-áýe kúshterinde aerodınamıkalyq, ushý jáne jaýyngerlik sıpattamalary boıynsha álemdegi eń jaqsy dep tanylǵan zamanaýı jaýyngerlik, áskerı-kóliktik, jattyǵý ushaqtary men tikushaqtar bar. Ótken jyly avıatsııalyq park 37 tonnaǵa deıin nemese 100-den astam áskerı qyzmetshini uzaq qashyqtyqqa tasymaldaýǵa qabiletti kópfýnktsıonaldy A400M áskerı-kóliktik ushaǵymen tolyqty.
Áýe kemesin paıdalanǵan jarty jyl ishinde ekıpaj jeke quramdy tasymaldaýda birqatar mindetterdi oryndady. Onyń ishinde Golan jotalaryndaǵy bitimgerlerdi rotatsııalaý, qazaqstandyq komandalardyń Birikken Arab Ámirlikterine UAE SWAT Challenge-2025 halyqaralyq jarystaryna aparyp kelý, «Aıbyn-2025» halyqaralyq áskerı-patrıottyq jastar jıynyn kólikpen qamtamasyz etý bar.
Áýe qorǵanysy kúshterin damytýdyń mańyzdy basymdyǵy avtomattandyrylǵan basqarý júıesin engizý bolyp otyr. Bul áýe qaýpi jaǵdaıynda barlyq bólimshelerdiń tıimdi ózara is-qımylyn qamtamasyz etýge, onyń ishinde jedel aqparat jınaýdan bastap jaýyngerlik is-qımyldardy úılestirýge jáne ushýdy basqarýǵa múmkindik beredi.
Áýe qorǵanysy kúshterinde jaýyngerlik daǵdylardy arttyrý, ushý quramyn kúrdeli mindetterdi oryndaýǵa daıyndaý, joǵary pılotaj daǵdylaryn ıgerý boıynsha júıeli jumys júrgizilýde. Áskerı ushqyshtar árqashan beıbit turǵyndarǵa kómekke kelýge daıyn. Armııalyq avıatsııa ekıpajdary adamdardy evakýatsııalaýǵa, 2024 jylǵy sý tasqyny kezinde azyq-túlik pen gýmanıtarlyq júkterdi jetkizýge, Abaı oblysyndaǵy orman órtin sóndirýge jáne jedel den qoıýdy qajet etetin basqa da mindetterge tartyldy.
Eske sala keteıik, buǵan deıin áskerge irikteý protsesi avtomattandyrylatynyn jazǵan edik.