Búgin astanalyqtardy qandaı merekelik sharalar kútip tur

ASTANA. KAZINFORM — Búgin — Astana kúni. Soǵan oraı, qalada 100-den astam merekelik is-shara uıymdastyrylyp jatyr. Jibek Joly arnasynyń «Búgin LIVE» baǵdarlamasyna qonaq bolǵan Astana qalasy mádenıet jáne ónerdi damytý bóliminiń basshysy qala qonaqtaryn qandaı tosyn syılar kútip turǵanyn baıandady.

— Astana qalasynyń ákimdigi Astana kúnine oraı 100-den astam is-shara uıymdastyrýdy josparlaǵan. Bul sharalardyń qatarynda mádenı-buqaralyq, sporttyq jáne áleýmettik baǵyttaǵy baǵdarlamalar qamtylǵan.

Qalalyq Mádenıet basqarmasy quramyndaǵy 14 mekemeniń barlyq ujymy merekege belsene qatysady.

5–6 shilde kúnderi Ázirbaıjan Mámbetov atyndaǵy teatrda «Armandar oryndalady» qoıylymynyń tusaýy kesiledi. Ereksheligi — qoıylymǵa kásibı ártister emes, túrli jumysshy mamandyq ıeleri qatysady.

Sondaı-aq qalalyq «Perfomans» festıvali ótedi. Ol ortalyq «Jetisu» saıabaǵynda sherý túrindegi sahnalyq kostıýmdermen bastalyp, ashyq aspan astyndaǵy qoıylymdarmen jalǵasady. Kirý — tegin.

6 shilde kúni qalanyń shet aımaqtaryndaǵy 6 aýdannyń 15 turǵyn úı alabynda kúndiz kontsert ótedi.

Keshke Astana Arena stadıonynda Open Air kontserti uıymdastyrylady. Onda Qazybek Quraıysh, «Dos-Muqasan», Nazima, 2rar syndy tanymal oryndaýshylar óner kórsetedi.

Dál sol sátte «Qazaq Eli» alańynda jastarǵa arnalǵan Jastar Energy kontserti ótedi. Mıras Júnisov, Artur jáne Erlan Qanatuly sahnaǵa shyǵady, — deıdi Aqerke Jumabaeva.

Mereke qarsańynda Astana qalasynyń turǵyndary men qonaqtaryna arnalǵan otbasylyq sharalar da uıymdastyrylmaq.

— Astana qalasynda «Merekelik saıabaq» jobasy aıasynda ashyq aspan astynda túrli otbasylyq is-sharalar ótedi. Balalarǵa sýret salý, beıneleý, otbasy bolyp qatysatyn shyǵarmashylyq belsendilikter uıymdastyrylady.

Sonymen qatar, 1 maýsymnan bastap «Otbasy TIME» jobasy iske qosylǵan. Demalys kúnderi qala saıabaqtarynda mádenı-buqaralyq is-sharalar men ashyq aspan astyndaǵy kıno kórsetilimderi ótip jatyr. Bul jobalar otbasylarǵa arnalǵan sapaly ári mazmundy demalys usynýdy kózdeıdi, — deıdi Astana qalasy mádenıet jáne ónerdi damytý bóliminiń basshysy.

Aqerke Jumabaeva astanalyq otbasylardy ekologııalyq sharaǵa da atsalysýǵa shaqyrdy.

— Astana qalasynyń tazalyǵyna basa mán berilip otyr. «Taza Qazaqstan» aktsııasy aıasynda qoldanylǵan plastık qaqpaqtardan 4 metrlik mysyq músini jasalady.

Kez kelgen otbasy óz plastık qaqpaqtaryn ákelip, osy sharaǵa qatysa alady. Bul joba arqyly sanaly tutyný men ekologııalyq mádenıetti qalyptastyrý maqsat etilgen.

Sonymen qatar, qaladaǵy halyqtyń tyǵyzdyǵy eskerilip, is-sharalar birneshe jerde qatar uıymdastyrylady, — dedi ol.

Aıta ketelik búgin Ortalyq Azııa men Eýrazııa keńistigindegi mańyzdy saıası, ekonomıkalyq jáne mádenı ortalyqqa aınalǵan elordamyz – Astana kúni.