Búgin — armııalyq avıatsııa kúni
ASTANA. KAZINFORM — Kásibı mereke 1992 jylǵy 29 jeltoqsannan bastaý alady. Dál osy kúni Qazaqstan Respýblıkasy Áskerı-áýe kúshteriniń quramyna Úsharal qalasynda ornalasqan 01852 áskerı bólimi alǵash ret engizilip, oǵan «486-shy jeke tikushaq polki» ataýy berildi.
Qorǵanys mınıstrligi baspasóz qyzmetiniń málimetinshe, búginde Áskerı-áýe kúshteriniń quramdas bóligi retinde armııalyq avıatsııa Qurlyq áskerleri men Áskerı-teńiz kúshterin avıatsııalyq qoldaýǵa, oqý-jattyǵý, jaýyngerlik jáne arnaıy mindetterdi oryndaýǵa baǵyttalǵan keshendi is-sharalardy júzege asyrady. Onyń qarý-jaraǵynda Mı-17V-5, Mı-8MT, Mı-171Sh, Mı-172, Mı-24V, Mı-35M, EC-145, UH-1H-II jáne Mı-26 tikushaqtary bar.
Tikushaqtardyń joǵary manevrlik qasıetteri atysqa qoldaý kórsetýge, áýe shabýylyna qarsy qorǵanys quraldaryn basýǵa jáne basqa da minddetterdi oryndaýǵa múmkindik beredi. Olardyń kómegimen áýe barlaýy, artıllerııalyq nysanany anyqtaý jáne atysty túzetý, áýeden mınalaý, radıoelektrondyq kúres mindetteri oryndalady.
Vıntti áýe kemeleri taktıkalyq áýe desantyn jáne barlaý-dıversııalyq toptardy túsirý, júkterdi, oq-dárilerdi, áskerı tehnıkany tasymaldaý jáne jaralylardy evakýatsııalaý úshin de qoldanylady.
Jaýyngerlik jáne kóliktik tikushaqtarsyz respýblıkalyq jáne halyqaralyq deńgeıdegi birde-bir oqý-jattyǵý, sondaı-aq áskerı jáne áýe sherýleri ótpeıdi. Qajet bolǵan jaǵdaıda armııalyq avıatsııa ekıpajdary tótenshe jaǵdaılar kezinde izdestirý-qutqarý jumystaryn júrgizedi jáne órtterdi sóndirýde TJM-ge kómek kórsetedi. Atap aıtqanda, 2024 jylǵy sý tasqyny kezinde armııalyq avıatsııa ekıpajdary sý basqan eldi mekender men qystaqtardan júzdegen turǵyndy evakýatsııalady.
Armııalyq avıatsııanyń jeke quramy táýlik boıy kezekshilik atqaryp, josparly da, kútpegen mindetterdi oryndaýǵa árdaıym daıyn. Ushqyshtardyń joǵary kásibıliginiń, jedeldiktiń jáne bólimshelerdiń utqyrlyǵynyń arqasynda barlyq qoıylǵan mindet qysqa merzimde, ýaqyt pen resýrstardy barynsha únemdeı otyryp, barynsha tıimdi oryndalady.
Budan buryn Kazinform tilshisi Qorǵanys salasyndaǵy ózgeristerge sholý jasaǵan edi.