Búgin — Analar kúni

ASTANA. KAZINFORM – Búgin qazaqstandyqtar Analar kúnin merekeleıdi.

— Qymbatty dostar! Bul mereke bizdiń elde alǵash ret 2023 jyly engizilip, sodan beri mamyr aıynyń ár ekinshi jeksenbisinde toılanyp keledi. Álemde Analar kúnin atap ótý tarıhy 100 jyldan asady. Búginde mereke álemniń kóptegen elderinde resmı mártebege ıe jáne memlekettik deńgeıde atalyp ótedi, — dep jazdy Mádenıet jáne aqparat mınıstri Aıda Balaeva Facebook paraqshasyna.

Mınıstr Memleket basshysy Qasym-Jomart Kemeluly Toqaevtyń: «Shyn máninde, árbir adam úshin anadan uly, anadan qymbat eshkim joq. Eń qasterli qundylyqtarymyz „Jer-ana“, „Otan-ana“ uǵymdarymen tyǵyz baılanysty. „Ata uldy, ana ultty tárbıeleıdi“ deıdi. Bul sózdiń aıryqsha mán-mańyzy bar» degen tsıtatasyn mysalǵa keltirdi.

— Shynynda da, áıelderdiń qoǵamdaǵy róli san qyrly. Olar otbasyna, balalarǵa qamqorlyq jasaıdy, jańa urpaqty tárbıeleıdi, eldiń qoǵamdyq ómirine belsene qatysady. Umaı ana, Domalaq ana, Rabııa Sultan Begim, Aıǵanym, Zere, Uljan jáne basqa da kóptegen qazaqtyń uly analary — ana mahabbaty men qoldaýy uly tulǵalardyń minezi men taǵdyryn qalyptastyratynynyń jarqyn mysaldary. Bıyl biz Analar kúnin 11 mamyrda atap ótemiz. Bul kún — bizge ómir, súıispenshilik pen qamqorlyq syılaǵan jandarǵa arnalǵan. Ana — jylýlyqqa, náziktikke, sheksiz súıispenshilik pen qoldaýǵa toly búkil álem. Bul kún analarymyzben ótkizgen árbir sáttiń qanshalyqty qymbat ekenin eske salyp, olardy qurmetteýdiń mańyzdylyǵyn uǵyndyrady, — dep jazdy vedomstvo basshysy. 

Aıda Balaeva qazaqstandyqtardyń shańyraqtaryna tek shattyq pen bereke tileıtinin jazdy.

— Sizderge zor densaýlyq, mol baqyt, amandyq tileımin! Halyqty keńinen habardar etý jáne analarǵa degen súıispenshilik pen rızashylyqtaryńyzdy bildirý maqsatynda áleýmettik jelilerde #Anaǵaqurmet heshtegin paıdalanyp, post jazýdy usynamyn. Estafetany QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa múshelerine, mádenıet qaıratkerlerine, BAQ, ÚEU ókilderine, qoǵam qaıratkerleri men barlyq qazaqstandyqtarǵa joldaımyn, — dedi ol.

Eske sala keteıik, byltyr Qazaqstanda alǵash ret Analar kúni toılanǵan bolatyn.