Búgin Almatyda jáne Óskemen, Semeı, Rıdder qalalarynda aýa sapasy tómendeıdi
ASTANA. KAZINFORM – «Qazgıdromet» RMK elimizdegi aýa sapasyna qatysty boljamyn jarııalady.
– 3 maýsymda túnde qolaısyz meteorologııalyq jaǵdaılar Óskemen, Semeı, Rıdder, Almaty qalalarynda kútiledi, – delingen habarlamada.
Qolaısyz meteorologııalyq jaǵdaılar – atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Eske sala ketsek, Qazaqstan 2035 jylǵa qaraı parnıktik gaz shyǵaryndylaryn 17%-ǵa qysqartýdy kózdep otyr. Bul týraly Eýrazııalyq ekonomıkalyq forým aıasynda ótken «Halyqaralyq Klımattyq kún tártibi: EAEO úshin syn-qaterler men múmkindikter» atty sessııa jumysy barysynda Qazaqstan Respýblıkasynyń Ekologııa jáne tabıǵı resýrstar vıtse-mınıstri Mansur Oshýrbaev aıtty.
Al oǵan deıin elimizdegi klımat qalaı ózgerip jatqanyn jazdyq.
