Búgin Almatyda terrorızmge qarsy oqý-jattyǵý ótedi

ALMATY. KAZINFORM –  Іs-iara kezinde metro poıyzdarynyń qozǵalysyna shekteý qoıylmaıdy.

Almaty qalasy terrorızmge qarsy jedel shtabynyń málimetinshe, búgin 22 mamyr kúni Belarýs kóshesi, 15 mekenjaıynda ornalasqan Almaty metropolıteni deposynyń aýmaǵynda saǵat 09:00-den 17:00-ge deıin josparly antıterrorlyq oqý-jattyǵýlar ótedi.

Oqytýdyń maqsaty – adam kóp shoǵyrlanǵan jerlerde terrorıstik qaýip-qater týyndaǵan kezde ózara árekettesý daǵdylaryn mashyqtandyrý.

– Qaýipsizdik sharalaryn saqtaýdy jáne memlekettik qyzmetkerlerdiń zańdy talaptaryn oryndaýdy suraımyz. Sondaı-aq resmı aqparat kózderin basshylyqqa alyp, jalǵan aqparattyń taralýyna jol bermeýge shaqyramyz,– delingen habarlamada.

Sonymen qatar, Ákimshilik quqyq buzý kodeksiniń 443-babyna sáıkes, qoǵamdyq tártipti qamtamasyz etýge qatysatyn adamnyń zańdy talabyna baǵynbaý ákimshilik jaýapqa ákelip soqtyratynyn eskerý qajet.

Osyǵan deıin josparly antıterrorlyq oqý-jattyǵý Almaty halyqaralyq áýejaıynyń aýmaǵynda ótken bolatyn.