Búgin Almaty, Astana men taǵy 6 qalada aýa sapasy nasharlaıdy
ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.
— 16 naýryzda aýanyń lastanýynyń qolaısyz meteorologııalyq jaǵdaılary Pavlodar, Qaraǵandy, Balqash, Jezqazǵan, Aqtóbe, Almaty, Astana qalalarynda, túnde Qostanaı qalasynda boljanǵan, — delingen habarlamada.
Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Aıta keteıik, búgin elimizdiń kóp bóliginde tuman men jel kúsheıedi.
Osyǵan deıin respýblıkada ekologııalyq aıyppuldardan túsetin qarjyny aýyldyq okrýgterdiń bıýdjetine berý josparlanǵany týraly jazdyq.
