Búgin álem chempıonatynda ekinshi týr oıyndary bastalady
ASTANA. KAZINFORM - Fýtboldan 2026 jylǵy álem chempıonatynda 18 maýsym jáne 19 maýsym kúnderi tórt oıyn ótkiziledi.
Bul joly A jáne V tobyndaǵy quramalar ekinshi týr oıyndaryn ótkizedi.
A tobynda 18 maýsymda Qazaqstan ýaqytymen 21:00-de Chehııa jáne Ońtústik Afrıka quramalary sheberlik baıqassa, bul topta 19 maýsymda saǵat 06:00-de Meksıka men Ońtústik Koreıa jasyl alańǵa shyǵady.
Alǵashqy týrda Ońtústik Koreıa Chehııany 2:1, Meksıka Ońtústik Afrıkany 2:1 esebimen tize búktirdi.
Sondaı-aq V tobynda 19 maýsymda saǵat 00:00-de Shveıtsarııa - Bosnııa jáne Gertsogovına, 03:00-de Kanada men Qatar kezdesedi.
Birinshi týrda Kanada - Bosnııa jáne Gertsogovına, Qatar men shveıtsarııa 1:1 esebimen teń tústi.
Álem chempıonatynyń fınaldyq kezeńi bir aıdan astam ýaqytqa sozylady. Týrnır jeńimpazy 19 shilde kúni Ister-Raterford qalasyndaǵy MetLife stadıonynda anyqtalady.
Bıylǵy doda birneshe kórsetkish boıynsha rekord jańartpaq. Eger 1930 jyly ótken alǵashqy álem chempıonatyna 13 qurama qatysqan bolsa, qazir olardyń sany 48-ge jetti. Matchtar sany da tarıhı maksımýmǵa jetip, jankúıerlerdi jalpy 104 oıyn kútip tur.
Týrnırdiń basty jańalyqtarynyń biri – jarys formatynyń ózgerýi. Toptyq kezeńde 48 qurama tórt komandadan quralǵan 12 topqa bólinedi. Pleı-off kezeńine ár toptan birinshi jáne ekinshi oryn alǵan komandalar, sondaı-aq úshinshi oryn ıelengen quramalardyń ishindegi úzdik segizi joldama alady.
Eske salsaq, fýtboldan álem chempıonatynda Ózbekstan quramasy alǵashqy kezdesýinde jeńilip qaldy.
