Búgin Aqtóbe qalasynda aýa sapasy nasharlaıdy

ASTANA. KAZINFORM — «Qazgıdromet» RMK Qazaqstan qalalaryndaǵy aýa sapasyna qatysty boljamyn jarııalady.

— 2025 jylǵy 25 mamyrda Aqtóbe qalasynda aýanyń lastanýynyń qolaısyz meteorologııalyq jaǵdaılary kútiledi, — delingen habarlamada.

Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.

Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.

Buǵan deıin habarlanǵandaı, Túrkistan oblysyndaǵy qoqys polıgondarynyń 70 paıyzy sanıtarlyq-ekologııalyq talaptarǵa saı emes.