Búgin 7 qalada aýa sapasy nasharlaıdy

ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady. 

— 2025 jylǵy 26 qarashada qolaısyz meteorologııalyq jaǵdaılar Almaty, Atyraý, Shymkent, Aqtóbe, Balqash, Jezqazǵan, Pavlodar qalalarynda bolýy múmkin, — delingen habarlamada. 

Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.

Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.

Aıta keteıik, keıingi eki aptada Tashkent qalasynda aýa sapasy kúrt nasharlady.