Búgin 6 qalada aýa sapasy nasharlaıdy
ASTANA. KAZINFORM — «Qazgıdromet» RMK elimizdegi aýa sapasyna qatysty boljamyn jarııalady.
«2025 jylǵy 25 qarashada Almaty, Atyraý, Shymkent, Aqtóbe, Balqash qalalarynda, túnde Astana qalasynda qolaısyz meteorologııalyq jaǵdaılar kútiledi», delingen habarlamada.
Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.
Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.
Eske sala ketsek, Qazgıdromet 24 qarashada aýa raıyna baılanysty 16 óńirde eskertý jarııalady.
Sondaı-aq búgin Abaı oblysynda aýa raıynyń nasharlaýyna baılanysty eskertý jarııalandy.