Búgin 2026 jylǵy qysqy Paralımpıada oıyndarynyń ashylý saltanaty ótedi
ASTANA. KAZINFORM - Italııanyń Mılan - Kortına-d’Ampetstso qalalarynda búgin 2026 jylǵy XIV qysqy Paralımpıadanyń ashylý saltanaty ótedi.
Saltanatty is-shara Qazaqstan ýaqytymen 23:50-de «Qazsport» telarnasynan tikeleı efırde kórsetiledi.
XIV qysqy Paralımpııa oıyndarynyń ashylý saltanaty 6 naýryz kúni Verona Olımpıadalyq arenasynda ótedi. Bul sharada elimizdiń Memlekettik týyn Erbol Hamıtov ustap shyǵady.
Bıylǵy dúbirli dodada Qazaqstan quramasy para shańǵy jáne para bıatlon sport túrleri boıynsha el namysyn qorǵaıdy. Halyqaralyq arenada Qazaqstan atynan 7 sportshy synǵa túsedi. Olardyń qatarynda Erbol Hamıtov, Nurlan Álimov, Aleksandr Gerlıts, ıÝrıı Berezın, Vladıslav Kobal, Sergeı Ýsoltsev jáne Anna Gracheva bar.
Qurama sapyndaǵy eń jas sportshy – para shańǵy jarysynda óner kórsetetin 17 jastaǵy Vladıslav Kobal. Al komandanyń eń tájirıbeli ári jasy úlken múshesi – para shańǵy jáne para bıatlonnan baq synaıtyn Sergeı Ýsoltsevtiń jasy 51-ge keldi.
Ulttyq quramadaǵy tájirıbeli sportshylardyń biri – Aleksandr Gerlıts 2022 jylǵy Beıjiń Qysqy Paralımpıadasynyń para bıatlonnan qola júldegeri atanǵan edi. Sondaı-aq ol 2018 jylǵy Phenchhan Paralımpıadasynda para shańǵy jarysynan úzdik tórttiktiń qataryna engen.
Sondaı-aq, Qazaqstan quramasynyń kóshbasshylarynyń biri Erbol Hamıtov – para bıatlon men para shańǵy jarysynan álem chempıonattarynyń júldegeri jáne birneshe márte álem kýbogy kezeńderiniń jeńimpazy. 2022-2023 jylǵy maýsymda ol para shańǵy jarysynan álem chempıony atanyp, Qazaqstan tarıhynda osy jetistikke qol jetkizgen alǵashqy para sportshy boldy. Al 2024-2025 jylǵy maýsym qorytyndysy boıynsha Erbol Hamıtov para bıatlonnan álem kýbogynyń jalpy esebinde jeńiske jetip, 31 jyldan keıin Qazaqstanǵa Hrýstal globýsty qaıta ákeldi.
Aıta keteıik, 2026 jylǵy Qysqy Paralımpıada 6-16 naýryz aralyǵynda Italııada ótedi. Baıraqty dodaǵa álemniń 600-den astam sportshysy qatysyp, 79 medal jıyntyǵy sarapqa salynady.
Bıyl Qysqy Paralımpıada qozǵalysynyń 50 jyldyq mereıtoıy atalyp ótedi. Alǵashqy Qysqy Paralımpıada 1976 jyly Shvetsııanyń Ernsheldsvık qalasynda ótken edi.