Búgin 14 oblysta aptap ystyq bolady — Qazgıdromet
ASTANA. KAZINFORM — «Qazgıdromet» boljamyna sáıkes, búgin el aýmaǵynda aýa raıy turaqsyz bolady.
Respýblıkanyń basym bóliginde naızaǵaı bolyp, jańbyr, keı jerlerde burshaq jaýýy múmkin.
Elimizdiń soltústik-batysynda, shyǵysynda, ortalyǵynda da nóserletedi. Qazaqstan aýmaǵynyń basym bóliginde jel kúsheıip, soltústik-batysta, soltústikte, shyǵysta — daýyl bolady dep boljanǵan.
Túnde jáne tańerteń respýblıkanyń soltústiginde, soltústik-batysynda, ońtústik-batysynda, shyǵysynda tuman bolýy múmkin.
Kúndiz Atyraý, Batys Qazaqstan, Aqtóbe, Almaty, Jetisý, Ulytaý oblystarynda, Qostanaı, Shyǵys Qazaqstan, Abaı oblystarynyń ońtústiginde qatty ystyq bolyp, aýa temperatýrasy 35-37 gradýsty kórsetedi.
Mańǵystaý oblysynda da qatty ystyq bolyp, 38-41 gradýsqa jetedi.
Túrkistan, Qyzylorda oblystarynda termometr 40-41 gradýsty kórsetip, aptap ystyq saqtalady.
Kúndiz Atyraý oblysynyń ońtústik-shyǵysynda, Aqtóbe oblysynyń ońtústiginde 40 gradýs óte qatty ystyq bolady.
Aıta keteıik, elimizde aýa sapasy lastanǵan qalalar sany azaımaı tur.
