Búgin 13 qalada aýa sapasy tómendeıdi

ASTANA. KAZINFORM — Sınoptıkter elimizdegi aýa sapasyna qatysty boljamyn jarııalady, dep habarlaıdy Kazinform «Qazgıdromet» RMK-ǵa silteme jasap. 

— 2025 jylǵy 24 qazanda qolaısyz meteorologııalyq jaǵdaılar Qostanaı, Qaraǵandy, Jezqazǵan, Temirtaý, Óskemen, Semeı, Rıdder, Aqtóbe, Aqtaý, Shymkent, Almaty, túnde Atyraý, Astana qalalarynda boljanǵan, — delingen habarlamada.

Qolaısyz meteorologııalyq jaǵdaılar — atmosferalyq aýanyń betki qabatynda zııandy (lastaýshy) zattardyń shoǵyrlanýyna yqpal etetin qysqamerzimdi meteofaktorlardyń (tymyq aýa raıy, jeńil jel, tuman, ınversııa) jıyntyǵy.

Qolaısyz meteorologııalyq jaǵdaı kezinde eldimekenderdegi atmosferalyq aýanyń sapasy nasharlaýy yqtımal.

Eske salaıyq, Óskemende aýa sapasynyń nasharlaýyna baılanysty oqýshylar mektepke barmaıdy.