«Búginniń balasy - bolashaqtyń danasy» festıvali bastaldy
Kúni keshe Astanada elimizdiń túkpir-túkpirinen jınalǵan ónerli balalar bas qosty. Balalardy Astana qalasynda eń birinshi bolyp anımatorlar qarsy alyp, áýe sharlaryna toly meıram bastalyp ketti.
Búgin, ıaǵnı 28 maýsym kúni «Qazmedıa Ortalyǵynda» 315-ke jýyq bolashaq juldyzdar bir sahna tórinde ónerlerin pash etýde.
«Búgin balalar úshin úlken qýanysh, elimizdiń ár óńirinen kelgen jas búldirshinder ónerlerin ortaǵa salyp jatyr. Osyndaı keń kólemdi sharanyń uıymdastyrylyp jatqanyna qýanyshtymyn, sebebi balalar bul jerde jarysqa túsip qana qoımaı, bir-birimen tanysyp, dostasady. Bizdiń balalar úıinen 38 jetkinshek keldi, festıvaldiń barlyq nomıtsaıasy boıynsha qatysamyz. Daıyndyǵymyz joǵary deńgeıde, sondyqtan júldeli oryndardan úmitimiz zor», - dedi №1 Almaty oblystyq balalar úıiniń tárbıeshisi Jámıla Myrzahmetova.
Sondaı-aq festıval uıymdastyrýshylary arman qýyp, Astana qalasyna kele jatqan jetkinshekterge aq tilegin bildirip, festıval mańyzy jaıynda oı qozǵady.
«Men festıvalǵa bı jáne sán óneri nomınatsııalary boıynsha qatysyp jatyrmyn. Festıval endi bastalsa da, basqa qalalardan kelgen balalarmen tanysyp, aralasyp kettim. Qarsylastaryma sáttilik, ózime jeńis tileımin», - deıdi festıval qatysýshysy, №1 Almaty oblystyq balalar úıiniń tárbıelenýshisi Araılym Taldybaeva.
Festıvaldiń ádilqazylar quramynda Merýert Ótekeshova, Marat Omarov, Baýyrjan Ibragımov, Jeńis Ysqaqova, taǵy basqa mádenıet jáne óner qaıratkerleri bar.
Aıta keteıik, festıvaldi uıymdastyrýshylar - Qazaqstan Respýblıkasynyń Mádenıet jáne sport mınıstrligi, «Aktıv laıf» múgedekterdiń qoǵamdyq birlestigi jáne Bahytjan Tajınovtyń Shyǵarmashylyq sheberhanasy.
