Búginnen bastap jeke kýálikterdi jedeldetip jasaý qyzmeti qaıta qosyldy - QR Ádilet mınıstrligi
ASTANA. 21 aqpan. QazAqparat /Arman Asqarov/ - Búginnen bastap ádilet organdary tólqujattar men jeke kýálikterdi jedeldetip jasaıtyn bolady. Bul týraly búgingi baspasóz máslıhatynda QR Ádilet mınıstrliginiń resmı ókili Erbolat Erimbet málim etti.
Buǵan deıin jeke qujattardy jasaýdyń jedeldetilgen qyzmeti ótinishterdiń kóbeıip ketýine baılanysty byltyr tamyz aıynda toqtatylǵan bolatyn. 2010 jyldyń ózinde 1 mln. 960 myń jeke kýálik pen 558 myńnan astam tólqujat jasalǵan. Búginde óndirýshi zaýyt 2010 jyldyń jeltoqsanynda berilgen ótinishter boıynsha qujattardy jasaýdy aıaqtaýda.
«2010 jyly jeke sáıkestendirý nómirleri joq qujattardyń almastyrylýy, sondaı-aq jańa úlgidegi elektrondy qujattardyń shyǵarylýy qolǵa alynǵan edi. Sol sebepti azamattardyń jeke kýálikterin shyǵarý týraly ótinishteri kóbeıip ketken. Endi, qujattardy jedel ári ýaqytynda jasaý úshin Ádilet mınıstrligi qosymsha jabdyq aldy. Onyń arqasynda tólqujattardy shyǵarý kólemin 1,5 esege kóbeıtýge múmkindik jasalyp otyr. Máselen, buryn óndirýshi zaýyt kúnine 10 myńǵa jýyq qujat daıyndasa, endi ol 16 myńǵa deıin tólqujat pen jeke kýálik shyǵara alady. Budan bylaı, barlyq azamattar óz qujattaryn zańmen kózdelgen merzimde alatyn bolady», - deıdi E.Erimbet.
Sondaı-aq onyń habarlaýynsha, resmı blankilerdiń úzdiksiz jetkizilýi qamtamasyz etildi. Bıyldan bastap tólqujat pen jeke kýálikterdiń blankileri tek «QR Ulttyq bankiniń Banknottyq fabrıkasy» RMK-da jasalatyn bolady.
Aıta keteıik, jeke qujattardy jasaýdyń jedeldetilgen qyzmeti aqyly negizde úsh jolmen jasalady: 7 jumys kúni (memlekettik baj somasy - 1989 teńge), 10 jumys kúni (memlekettik baj somasy - 904 teńge), 15 jumys kúni (memlekettik baj somasy - 563 teńge). Qujattardy jedeldetip jasaýǵa memlekettik tólemderdi kez-kelgen bankterde jáne Halyqqa qyzmet kórsetý ortalyqtarynda jasaýǵa bolady.
