Búginnen bastap M. Áblıazovtiń jubaıy kez kelgen elge shyǵa alady - QR SІM
ASTANA. 24 jeltoqsan. QazAqparat - Qazaqstan quqyqqorǵaý organdarynyń yqpalymen Muhtar Áblıazovtiń otbasyna jańa tólqujattar berilip, olar sheteldik vıza alý múmkindigine ıe boldy.
Bul týraly búgin ótken brıfıngte QR SІM Halyqaralyq aqparat komıteti tóraǵasynyń orynbasary Janbolat Úsenov málim etti.
«QR quqyq qorǵaý organdary Alma Shalabaevaǵa qatysty bultartpaý sharasyn Almaty qalasynan tys eshqaıda shyqpaý týraly qolhattan qarjylyq kepildikke ózgertý týraly sheshim qabyldady. Bul sheshim Alma Shalabaevanyń jeke ótinishi, sondaı-aq Italııa úkimetiniń ótinishi negizinde qabyldandy. Italııa Qazaqstannyń mańyzdy seriktesi bolyp tabylady. Osy oraıda, biz atalǵan máselege qatysty osy eldiń Syrtqy ister mınıstrligimen birlese otyryp, syndarly jumys atqardyq», - dedi J.Úsenov.
J. Úsenov atap ótkendeı, Qazaqstannyń quqyq qorǵaý organdary Alma Shalabaevaǵa jáne onyń qyzyna jańa tólqujattardy alýǵa kómektesti.
«Alma Shalabaeva aǵymdaǵy jyldyń shilde aıynan bastap Almaty qalasyndaǵy ata- anasynyń úıinde turyp keldi. Qazaqstannyń quqyq qorǵaý organdary Alma Shalabaevaǵa jáne onyń qyzyna jańa tólqujattardy alýǵa kómek kórsetti. Osyǵan baılanysty olar sheteldik vıza alý múmkindigine ıe bolyp otyr. Búginnen bastap ol óziniń qalaýy boıynsha kez kelgen memleketke shyǵa alady», - dedi ol.
