Búginnen bastap azamattardyń jekelegen sanattary úshin járdemaqy mólsheri 14,5% - ǵa ósti
Sonymen qatar 7 jáne odan da kóp bala týyp, tárbıelegen marapattalǵan analarǵa beriletin járdemaqy mólsheri 7,4 aılyq eseptik kórsetkishke deıin arttyryldy.
2023 jylǵy 29 naýryzda VIII saılanǵan Parlamenttiń birinshi sessııasynyń ashylýynda Memleket basshysy múgedektigi bar adamdardy qoldaý sharalaryn kúsheıtý qajettigin atap ótken bolatyn.
Eńbek jáne halyqty áleýmettik qorǵaý mınıstrliginiń habarlaýynsha, Áleýmettik kodeks sheńberinde 2023 jylǵy 1 shildeden bastap memlekettik járdemaqylardyń mynadaı túrleriniń mólsherin orta eseppen 14,5% - ǵa arttyrý kózdelgen:
- múgedektik boıynsha;
- asyraýshysynan aıyrylý jaǵdaıy boıynsha;
- arnaıy áleýmettik járdemaqylar;
- múgedektigi boıynsha aılyq járdemaqy mólsherine deıin jasyna baılanysty zeınetaqy tólemderine qosymsha aqy alýshylardy qospaǵanda, jasyna baılanysty zeınetaqy tólemderi nemese eńbek sińirgen jyldary úshin zeınetaqy tólemderi taǵaıyndalǵan birinshi, ekinshi jáne úshinshi toptaǵy múgedektigi bar adamdarǵa arnaýly memlekettik járdemaqylar;
- Baıqońyr qalasynda turatyn jáne Reseı Federatsııasynyń zańnamasyna sáıkes múgedektigi boıynsha zeınetaqy alatyn 7 jasqa deıingi múgedektigi bar balalarǵa arnaýly memlekettik járdemaqy;
- saıası qýǵyn-súrgin qurbandaryna nemese saıası qýǵyn-súrginnen zardap shekken, múgedektigi bar nemese zeınetker bolyp tabylatyn adamdarǵa arnaýly memlekettik járdemaqy;
- Qazaqstan Respýblıkasy aldynda erekshe eńbegi úshin zeınetaqy taǵaıyndalǵan adamdarǵa arnaýly memlekettik járdemaqy.
Osylaısha, joǵaryda atalǵan járdemaqy túrlerin 2022 jylmen salystyrǵanda 23% - ǵa ulǵaıtý qamtamasyz etiledi (osy jylǵy 1 qańtardan bastap 8,5% - ǵa ósýdi eskere otyryp). Osy maqsattarǵa respýblıkalyq bıýdjetten qosymsha 37 mlrd teńge bólindi.
Budan basqa, 2023 jylǵy 1 shildeden bastap memlekettik járdemaqylardy 14,5% - ǵa arttyrý kózdelgen:
- birinshi toptaǵy múgedektigi bar adamǵa kútim jasaıtyn adamǵa;
- múgedektigi bar balany (múgedektigi bar balalardy) tárbıelep otyrǵan anasyna nemese ákesine, asyrap alýshyǵa, qorǵanshyǵa (qamqorshyǵa).
Búginde bul járdemaqylardyń mólsheri 1,4 eń tómengi kúnkóris deńgeıin nemese 2023 jyly 56 794 teńgeni quraıdy. Áleýmettik kodeks kúshine engen kezde járdemaqy mólsheri 2023 jyly 1,61 eń tómengi kúnkóris deńgeıine nemese 65 313 teńgege deıin artady. Osy maqsattarǵa respýblıkalyq bıýdjetten qosymsha 6,4 mlrd teńge bólindi.
Áleýmettik kodekste sondaı-aq «Altyn alqa» alqasymen nagradtalǵan nemese buryn «Batyr Ana» ataǵyn alǵan, I jáne II dárejeli «Ana dańqy» ordenderimen nagradtalǵan áıelderge tólenetin járdemaqy mólsherin saralaý kózdeledi.
Eger búginde 6, 7 jáne odan da kóp bala týyp, tárbıelegen analar birdeı mólsherde járdemaqy alsa, endi 2023 jyldyń 1 shildesinen bastap «Altyn alqa», «Batyr ana», I jáne II dárejeli «Ana dańqy» ordenderimen nagradttalǵan, ıaǵnı 7 jáne odan da kóp balany ómirge ákelip tárbıelegen analarǵa arnalǵan járdemaqy mólsheri 7,4 aılyq eseptik kórsetkishke deıin arttyrylady.
Sonymen qatar, osy jyldyń 1 shildesinen bastap Memlekettik áleýmettik saqtandyrý qorynan tólenetin eńbekke qabilettiliginen aıyrylý jáne asyraýshysynan aıyrylý jaǵdaılary boıynsha áleýmettik tólemderdiń mólsherin 14,5% - ǵa arttyrý júrgiziletin bolady.
Tólemderdiń mólsheri jeke jáne mynalarǵa baılanysty: sońǵy 2 jyldaǵy MÁSQ-ǵa áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffıtsıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty aýystyrý.
Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asyrylady, sondaı-aq 2023 jylǵy 1 qańtardan bastap QR Úkimetiniń sheshimimen olardyń mólsheri 8,5%-ǵa ulǵaıtyldy.
Joǵaryda kórsetilgen járdemaqylardyń mólsherin arttyrý Eńbek jáne halyqty áleýmettik qorǵaý mınıstrliginiń aqparattyq júıelerinde bar málimetter negizinde avtomatty túrde júrgiziletin bolady, osyǵan baılanysty alýshylardyń ýákiletti organdarǵa qosymsha ótinishi talap etilmeıdi.
