Búginnen bastap Astanada jylý berile bastaıdy - I. Tasmaǵambetov
ASTANA. 5 qazan. QazAqparat - Biz jylýdy 10 qazannan bastap berýdi josparlaǵanbyz. Alaıda kúnniń erterek sýytyp ketýine baılanysty, búginnen bastap qalaǵa jylý beriledi.
Bul týraly búgin Astana qalalyq ákimdiginde kúzgi-qysqy jylý berý maýsymyna Astananyń daıyndyǵy máselesi boıynsha jınalys ótkizgen qala ákimi Imanǵalı Tasmaǵambetov málimdedi.
Onyń aıtýynsha, aldymen balabaqsha, bilim berý, densaýlyq saqtaý jáne mádenıet mekemelerine jylý beriledi. «Osylaısha, qazannyń 15-ine deıin qalanyń barlyq nysandary jylýǵa qosylatyn bolady», - dedi ákim.
Jınalysta ákimniń orynbasary-2012-2013 jylý berý maýsymyna daıyndyq boıynsha qalalyq shtabtyń tóraǵasy Vasılıı Krylovtyń jáne Almaty, Esil, Saryarqa aýdan ákimderiniń esebin tyńdaǵan I. Tasmaǵambetov elordanyń jylý berý maýsymyna tolyq daıyn ekendigin jetkizdi.
