Búginnen bastap Astana halyqaralyq áýejaıynyń kólik turaǵynda baǵa qymbattady

ASTANA. QazAqparat - Astana halyqaralyq áýejaıynda búginnen bastap avtoturaq quny ózgerdi, dep habarlaıdy QazAqparat áýejaı ákimshiligine silteme jasap.

Osyǵan deıin habarlaǵanymyzdaı, 1 tamyzdan bastap áýejaıdyń kólik turaǵynda jańa tarıf qoldanysqa endi.

Búginnen bastap P1, P2, P3 aımaǵyndaǵy avtoturaq baǵasy 100 teńgeden 200 teńgege kóterildi.

Al P4, P5, P6 aımaǵyndaǵy kólik turaǵynyń baǵasy saǵatyna 50 teńgeden 100 teńgege ózgerdi.

Jolaýshylarǵa yńǵaıly bolý úshin jasalǵan otyrǵyzý-túsirý ekspress jolaǵyn teris paıdalaný faktileriniń kóbeıýine jáne jolaýshylardan kelgen shaǵymnyń artýyna baılanysty 15 mınýttyq tegin otyrǵyzý-túsirý jolaǵyna táýlik ishinde úshinshi ret nemese odan da kóp kirgen jaǵdaıda jańa tarıf boıynsha 300 teńge tóleısiz.

Alaıda áýejaıdaǵy jabyq turaqtyń quny esh ózgerissiz qalady. Jabyq turaq ishki reıster oryndalatyn T2 termınalynyń oń jaǵynda ornalasqan.

274 orynǵa shaqtalǵan jabyq turaqtyń quny - 12 saǵatqa 1400 teńge. Táýligine 1800 teńge.

12-24 saǵat aralyǵynda 2000 teńge.