Búginnen bastap «7- Arna» televızııalyq habar taratýdyń jańa úlgisine kóshti - B.Jeksenbaı
ASTANA. 17 qańtar. QazAqparat /Gúlmıra Álıakparova/ - Búginnen bastap «7-Arna» televızııalyq habar taratýdyń jańa úlgisine kóshti. Bul týraly búgin ótken baspasóz máslıhatynda Telearnanyń dırektorlar keńesiniń tóraǵasy Bıbigúl Jeksenbaı aıtty.
B.Jeksenbaıdyń aıtýynsha, «Jetinshi arna» oıyn-saýyq baǵdarlamalaryn shyǵarý jónindegi Endemol kompanııasynyń strategııalyq áriptesi bolyp tabylatyn «VaıT Medıa» kompanııalar tobymen jasaǵan uzaq merzimdi kelisimniń nátıjesinde óziniń damý strategııasyn tolyǵymen ózgertti.
Telearna tipti, óziniń logotıpi men fırmalyq stılin jańalady. Onyń jańartylǵan slogany: «Jetinshi arnamen birge, ózgeretin ýaqyt keldi», dep atalady.
B.Jeksenbaıdyń sózine qaraǵanda, telearnanyń jańa kestesi 80 paıyz premeralardan turady. Olardyń arasynda Endemol kompanııasynyń kópke tanymal The Money Drop brıtandyq shoýy bar. Shoýdyń «Qyryq mıllıon teńgeniń shoýy» atpen qazaqstandyq nusqasy ekranǵa aldaǵy senbi, 22 qańtar kúni shyǵady. Baǵdarlamanyń basty demeýshisi retinde - «Qazkommertsbank» shyǵyp otyr.
Sondaı-aq kórermenderge «VaıT Medıanyń» «Naǵyz ómir» atty dokýdramasy men Endemol-dyń álemge tanymal jobalary - SupersizeSuperskinny, WipeOut USA, ExtremeMakeover: HomeEdition, SnogMarryAvoid jáne taǵy basqalardyń qazaqstandyq nusqalary usynylatyn bolady.
Jańa strategııadaǵy otandyq ónimderdiń arasynda bir-birin izdegen jastarǵa arnalǵan, qazaq tildegi «Jar-jar» tele-shoýy bar. Jalpy atalmysh sheteldik kompanııalardyń «Jetinshi arna» efıriniń qurylymyndaǵy úlesi 2011 jyly 25 paıyzdy quraıtyn bolady.
Eske salaıyq, «Jetinshi arna» 2009 jyldyń 9 qyrkúıeginde «Era» elordalyq telearnasynyń bazasynda qurylyp, respýblıka aýmaǵyna taratyla bastady. 2010 jyldyń sońyna qaraı telearnanyń efırlik sıgnaly Qazaqstan halqynyń 70 paıyzyna qoljetimdi boldy.
