Búgingideı kúrdeli geosaıası jaǵdaıda kórshi eldermen dostyq baılanysta bolý asa mańyzdy – Rýslan Jeldibaı

NUR-SULTAN. QazAqparat – QR Prezıdentiniń Baspasóz hatshysy Rýslan Jeldibaı Qytaı Halyq Respýblıkasy Tóraǵasy Sı Tszınpınniń Qazaqstanǵa saparyna baılanysty pikir bildirdi, dep habarlaıdy QazAqparat.

«Búgin elimizge Qytaı Halyq Respýblıkasynyń Tóraǵasy Sı Tszınpın memlekettik saparmen keldi. Bul onyń pandemııadan keıingi shetelge jasaǵan alǵashqy sapary. Prezıdent Qytaı basshysyn áýejaıda ózi kútip alyp, qurmet kórsetti.

Keıin «Aqordada» keńeıtilgen quramda ekijaqty kelissóz ótti. Kezdesý barysynda kólik-logıstıka, azyq-túlik ónerkásibi, aýyl sharýashylyq salalarynyń máseleleri men transshekaralyq ózender jaıy talqylandy.

Prezıdent Qazaqstan men Qytaı arasynda jańa «altyn 30 jyldyq» kezeń bastaldy dedi. Bul málimdeme eki al arasyndaǵy qarym-qatynas joǵary deńgeıde ekenine dálel. Sebebi halyqaralyq dıplomatııada árbir sózdiń quny bar»,-dep jazdy Baspasóz hatshysy óziniń Facebook paraqshasynda.

Sondaı-aq ol eki el arasyndaǵy baılanysty nyǵaıtýǵa úles qosqany úshin Prezıdent QHR Tóraǵasy Sı Tszınpındi elimizdiń eń joǵary memlekettik nagradasy – «Altyn Qyran» ordenimen marapattaǵanyn atap ótti.

Óz kezeginde Qytaı basshysy «Qytaı Qazaqstanmen qarym-qatynastarǵa erekshe mán beredi. Biz qandaı jaǵdaı bolsa da, Qazaqstannyń táýelsizdigin, memlekettiligin, terrıtorııalyq tutastyǵyn saqtaýyna qoldaý bildiremiz. Qazaqstan men Qytaıdyń dostyǵy jańa deńgeıge shyǵatynyna kámil senemin» dep elimizge qurmetin kórsetti.

«Búgingideı kúrdeli geosaıası jaǵdaıda kórshi eldermen yntymaqta, dostyq baılanysta bolý asa mańyzdy ekeni daýsyz»,-deıdi Rýslan Jeldibaı.

Foto: akorda.kz