Búgingideı qarqynmen qoljetimdi turǵyn úı tapshylyǵy problemasyn taıaý 50 jylda da joıa almaımyz - D. Nazarbaeva
ASTANA. 7 jeltoqsan. QazAqparat - Búgingideı qarqynmen qoljetimdi turǵyn úı tapshylyǵy problemasyn taıaý 50 jylda da joıa almaımyz.
Parlamentte «Halyqty turǵyn úımen qamtamasyz etýdiń jaı-kúıi men perspektıvalary» atty taqyrypta ótken parlamenttik tyńdaýda Májilis depýtaty Darıǵa Nazarbaeva osylaı málim etti.
«Búgingi tyńdaý barysynda biz árbir qazaqstandyqqa qatysy bar birqatar máselelerdi talqylamaqpyz. Onyń ishinde paıdalanýǵa berilgen turǵyn úıdiń jan basyna shaqqandaǵy kólemin eleýli túrde qalaı kóbeıtýge bolady, kezek kútý problemasy qalaı jáne qashan sheshimin tabady, turǵyn úı qurylysyn qarjylandyrý júıesin qalaı tıimdi uıymdastyrý kerek degen máseleler óte mańyzdy. Áıtse de bizdiń qolymyzda bar málimetter kóńilimizge úmit uıalata qoımaıdy. Resmı derekter boıynsha 2011 jyly kezekte turǵan 147 myń adamnan 4 myń 901 adam ǵana, ıaǵnı olardyń 3 paıyzy ǵana oıdaǵy armanyna qol jetkizip, baspanaly bolǵan. Muny sózben túsindirip jatýdyń ózi artyq», - dedi jıyndy ashyp sóz sóılegen depýtat D. Nazarbaeva.
Onyń aıtýynsha, bundaı qarqynmen qoljetimdi turǵyn úı tapshylyǵy problemasy taıaý 50 jylda da joıylmaıdy. Bul rette depýtat mundaı qoljetimdi turǵyn úı alýmen azamattardyń tórt sanaty ǵana úmittene alatynyn, al keltirilgen málimetter qalyptasqan jaǵdaıdy tolyq kórsete almaıtynyn jetkizdi. «Bizdiń oıymyzsha, turǵyn úıge naqty muqtaj adamdardyń sany atalǵan normadan 2-3 esege asyp túsedi», - dedi D. Nazarbaeva.
