Búgingi zańnama brakonerlerdi quryqtaýǵa tolyq múmkindik bermeı otyr - Bas prokýratýra
«Kásibı sıpatqa ıe bolǵan qylmystyq áreketterge baılanysty jaýapkershilik kúsheıtiledi. Ol qylmystyń sanatyna brakonerlikti (QR QK 335, 337, 339-baptary) jatqyzýǵa bolady. Brakonerlikke birneshe ret barǵandar nemese top bolyp shyqqandar, kúzetilgen aýmaqta ańshylyq jasaǵandarǵa sanktsııa kúsheıedi. ıAǵnı, bul rette mindetti tárkileý tetigi engiziledi», - dedi Bas prokýratýra janyndaǵy Quqyq qorǵaý organdary akademııasynda qylmystyq is júrgizý zańnamasyn jetildirý máseleleri boıynsha zań jobasynyń tujyrymdamasyn talqylaýǵa arnalǵan krımınologııalyq forýmda Bas prokýratýra normoshyǵarmashylyq basqarmasynyń bastyǵy Almas Muhametjanov.
Onyń aıtýyna qaraǵanda, kez kelgen zańsyz ańshylyq túrine aldaǵy ýaqytta jaýapkershilik kúsheıedi.
«Qazirgi ýaqytta brakonerlik boıynsha qylmystyq jaýapkershilik tek avıa, avto jáne motokólikpen, jarý qurylǵysymen brakonerlik jasalǵan jaǵdaıda ǵana kózdelgen. Sonymen birge, mynaǵan nazar aýdaryńyzdarshy, brakonerlik boıynsha qylmystyq jaýapkershilikke adamdar «ańdardy jappaı qyrý quralyn qoldanǵan jaǵdaıda» ǵana tartylady. Endi suraq - sońǵy atalǵan bólik zańsyz ańshylyqtyń qandaı túri? Zańnyń bul bóligi 1997 jyldan beri búginge deıin qalmaı kele jatyr», - deıdi Almas Muhametjanov.
Bul másele týraly QR Bas prokýrorynyń orynbasary Marat Ahmetjanov ta pikir bildirdi.
«Búgingi zańnama qylmyskerlerdi (brakonerlerdi - avt.) quryqtaýǵa tolyq múmkindik bermeı otyr. Sondyqtan, usynylyp otyrǵan ózgerister boıynsha, zańsyz ańshylyq qandaı da bir qarýmen jasalsa, ol adam birinshiden qylmysker sanatyna jatqyzylady. Ekinshiden, ańshylyq barysynda mingen kóligi, zańsyz ańshylyqqa negiz bolǵan búkil múlki memleket menshigine tárkilenedi», - dedi Marat Ahmetjanov.
