Búgingi zamanda bos júretin adam bolmaýy kerek - Memleket basshysy

ASTANA. QazAqparat - Búgingi zamanda bos júretin adam degen bolmaýy kerek. Aqordada ótip jatqan Úkimettiń keńeıtilgen otyrysynda Eńbek jáne halyqty áleýmettik qorǵaý mınıstriniń baıandamasyn tyńdaǵan soń QR Prezıdenti Nursultan Nazarbaev osyndaı pikir bildirdi.

«Bizdiń memleketimizdiń kedeıshilikke qarsy jasaıtyn sharasy men qamqorlyǵy - azamattardy jumyspen qamtamasyz etý. Halyq memleket usynatyn jumyspen barynsha qamtylýy shart, jumys istegisi keletinder shet qalmaıdy. Bul baǵyt jalǵasa túsedi. Ózin-ózi jumyspen qamtýshylar áli de barshylyq. Sondyqtan da, jumyssyzdardy oqytý, olardy qoldaý, shaǵyn nesıemen qamtamasyz etý basty nazarda bolady», - dedi Elbasy.

Memleket basshysy bul jumysty toqtatpaý kerektigin, ortalyq organdardan bastap barlyq ákimder buǵan jaýapty bolatynyn qadap aıtty.

«Bos júretin adam bolmaýy kerek. Myna zamanda qalaı adam bos júredi, aıtyńdarshy?! Eger aýylda isteıtin jumys qalmasa, nesıe alyp kásip ash, mal baǵyp, qus ósir. Bul bolmasa qalaǵa kelip oqysyn, jumys isteý úshin mamandyq alsyn. Budan artyq biz ne isteımiz? Sony halyqqa túsindirińder. Memleket jumyspen qamtý úshin qoldan kelgenniń bárin jasap jatyr. Mundaı aýqymdy qarajat bólip, keshendi shara atqaryp jatqan álemde bizden basqa eshkim joq», - dedi N. Nazarbaev.