Búgingi zaman talabyna saı jýrnalıst mamandaryn daıarlaý týraly ortaq oılar ortaǵa salyndy
ANA. 27 maýsym. QazAqparat - Baspasóz kúnine oraı L.N.Gýmılev atyndaǵy Eýrazııa ulttyq ýnıversıtetinde Qazaqstan jýrnalıstıkasynyń ózekti máselelerine arnalǵan dóńgelek ústel ótti.
Oǵan elimizdegi buqaralyq aqparat quraldarynyń basshylary men jetekshi jýrnalıster qatysty.
Basqosýda qazirgi jýrnalıstıkanyń asa mańyzdy máseleleri sóz boldy. Dóńgelek ústelge qatysýshylar búgingi zaman talabyna saı jýrnalıst mamandaryn daıarlaý týraly ortaq oılardy ortaǵa saldy.
Aıta ketý kerek, búginde jýrnalıster negizinen eki bilim ordasynda - Ál-Farabı atyndaǵy Qazaq ulttyq ýnıversıteti men Eýrazııa ulttyq ýnıversıtetinde daıyndalady.
Kirispe sóz sóılegen Eýrazııa ulttyq ýnıversıtetiniń rektory Baqytjan Ábdiraıym jańadan qurylǵan jýrnalıstıka fakýltetiniń aıaǵynan nyq turyp, bedelge ıe bolǵanyn aıtty. Ótken jyly jýrnalıstıka fakýltetine 11-den astam «Altyn belgi» ıegerleri qabyldanǵan. Bul óte úlken kórsetkish. Atalǵan salaǵa bólinetin granttardyń ıegerleri Eýrazııa ulttyq ýnıversıtetin tańdaǵan.
Shetelden kelgen meıman, Ystambul ýnıversıteti jýrnalıstıka fakýltetiniń dekany, doktor, professor Aıdemır Oqaı Túrkııadaǵy BAQ-tyń damýy, mamandardy daıarlaýdyń erekshelikteri jaıly aıtyp berdi.
Baspasóz jáne baspa isi kafedrasynyń meńgerýshisi N.Omashuly jýrnalıst mamandaryn daıarlaýda oqý josparlaryn búgingi zaman talabyna saı jasaý, dáris berýge daryndy ustazdardy tartý týraly oılarymen bólisti.
«Egemen Qazaqstan» respýblıkalyq gazeti» AQ-nyń prezıdenti, jazýshy Saýytbek Abdrahmanov jýrnalıstıka salasynyń ózekti máselelerin qozǵady. Mamandardy daıarlaýda olardyń bilimi men biliktiligin arttyrý, ǵalamdyq aqparat álemindegi jýrnalıstiń róli jaıly áńgimeledi. Tek qana baspasóz habarlamasyn jazýǵa shamasy jetetin sapasyz mamandardy shyǵarýǵa jol bermeý kerektigin aıtty.
«Aıqyn» gazetiniń Bas redaktory, qalamger Nurtóre Júsip qazaq jýrnalısteriniń shetel tilin meńgerýi de búgingi tańdaǵy ózekti másele ekenin aıtty. Bilim ordalary álemniń jetekshi tilderin de úıretýge mán bergeni jón ekenin alǵa tartty.
«Astana» jýrnalynyń Bas redaktory Maqsat Táj-Murat kóptegen basylymdardyń memlekettik organdar taratatyn baspasóz habarlamasyn kóshirip basýdan arylmaı otyrǵanyn aıtty. Búgingi baspasózdiń tym aqparattanyp, saıasılanyp bara jatqanyn málim etti.
Belgili qalamger Nesip Júnisbaıuly ózin de «Búgingi jýrnalıstıka qaıda ketip bara jatyr?» degen suraq tolǵanyratynyn málimdedi. Ol sel sekildi búgingi zamannyń qaptap kele jatqan, jýrnalıstıkany taptap kele jatqan qozǵalysyna shamamyz kelgenshe qazaq baspasóziniń myqtylary bolyp qarsylasýymyz kerek ekenin aıtty.
Osy jıynda Májilis depýtaty Irak Elekeev, saıası ǵylymdardyń doktory, professor Náýbet Qalıev, tanymal qalamgerler Aıaǵan Sandybaı, Sádibek Túgel, «Nur-Astana» gazetiniń Bas redaktory Ǵabıt Músirep, jýrnalıst Sharafaddın Ámir BAQ máselelerine qatysty óz oılaryn ortaǵa saldy.
Sonymen qatar qalamgerler qazaq baspasózin qarjylandyrý isi ońtaıly sheshilmeı kele jatqanyn, óz elinde jetim balanyń kúıin keship otyrǵanyn ashyna aıtty.
«Til» jýrnalynyń Bas redaktory Nurgúl Qaraǵoıshına, ásirese, Astana qalasynda qazaq basylymdaryn taratýda kóptegen jasandy túrde kedergiler jasalyp otyrǵanyn jasyrmady.
Eýrazııa ulttyq ýnıversıtetiniń prorektory, fılologııa ǵylymdarynyń doktory, alashtanýshy-ǵalym Dıhan Qamzabekuly osy alqaly basqosýda aıtylǵan usynys-pikirler eskeriletinin jetkizdi
Eýrazııa ulttyq ýnıversıtetiniń professory Qaırat Saq jýrnalıstıka fakýltetiniń aldynda qyrýar jumystar turǵanyn, ózine júktelgen senimdi aqtaýǵa bar kúshin salatynyn aıtty.
Sonymen qatar senbi kúni jýrnalıster arasynda Aqseleý Seıdimbek atyndaǵy bılıardtan týrnır ótti.
