Búgingi urpaq aqıqatty bilýi, qasiret shegip, azappen kóz jumǵandardy este saqtaýy qajet - A. Bıjanov
ASTANA. 29 mamyr. QazAqparat - Búgingi urpaq aqıqatty bilýi, qasiret shegip, azappen kóz jumǵandardy este saqtaýy qajet.
Búgin Parlament Májilisinde Qazaqstandaǵy jappaı asharshylyqqa 80 jyl tolýyna baılanysty ótken dóńgelek ústel barysynda Cenat depýtaty Aqan Bıjanov osylaı málim etti.
Sóz arasynda senator Aqan Bıjanov qazaq halqynyń tarıhy baı da qatparly ekenin, onda uly jetistikter men jeńister, sondaı-aq qasiret synaqtary men úreıge toly kezeńderi az bolmaǵanyn eske saldy.
«Tarıh tereńine táýelsizdikke ıe bolǵan búgingi kún bıiginen kóz jibere otyryp, ekonomıkalyq jáne áleýmettik saıası jaǵynan álemdik qaýymdastyqqa laıyqty ornyn ıelengen memleket qurǵanymyzǵa táýbe deımiz. Búgingi tabystarymyzdyń aýqymdylyǵyn shamalap, halqymyzdyń 30 jyldardaǵy jaǵdaıynyń qanshalyqty aýyr bolǵanyn baǵamdaı alamyz. Asharshylyq máselesi boıynsha zertteýshiler tek asharshylyq oqıǵalary men shektelmeı, ótken ǵasyrdyń ishinde qazaq halqynyń basyna aýyrtpashylyqtar ákelgen túrli oqıǵalardy qamtı otyryp, onyń sebepterin taldap, oı qorytýda. Al búgin biz Qazaqstan tarıhynyń eń aýyr paraqtaryn ashyp otyrmyz», - dedi senator.
Onyń aıtýynsha, búgingi kúnniń basty maqsattarynyń biri barynsha tarıhı ádildikti ornatý jáne bolyp ótken oqıǵalardy, tarıhty umytpaı keleshekke jetkizý bolyp tabylady. Al atalmysh asharshylyq oqıǵasy qazaq dalasynda eń qasiretti de surapyl kezeńderdiń biri bolyp otyr.
«Osy jyldary qazaq halqy sany kúrt tómendedi, kóbisi shetel asyp ketti. Keńes úkimetiniń ótkizgen halyq sanaǵy boıynsha qazaqtardyń sany 1926 jyly 3 mln. 968 myń 289 adam bolsa, 1937 jyly 2 mln. 862 myń 458 adamǵa deıin azaıǵan. Al Qazaqstan aýmaǵynan basqa memleketterge sharasyz kóshken adamdarǵa baılanysty ǵalymdar málimetine súıensek, olar 1- mln.-ǵa jýyq boldy. Tek 1970 jyldary turǵylyqty halyq sany qaıta qalpyna kele bastady», - dedi Aqan Bıjanov.
Senator osynaý náýbetti kezeńdi árbir Qazaqstan azamaty bilýi tıis ekenin aıtty. «Bolǵan qasiretti oqıǵalardy qaıtaryp túzeı almasaq ta, jastardy tárbıeleý arqyly, olarǵa tarıhty sińirý arqyly biz bolashaqta ondaı qıyn zamandy boldyrmaýyn qolǵa alatyn bolamyz. Búgingi urpaq aqıqatty bilýimiz, qasiret shegip, azappen kóz jumǵandardy este saqtaýymyz qajet», - dedi ol.
