Búgingi teleekran osy zamannyń besik jyry ekenin umytpaýymyz kerek - Q. Aıtahanov
ASTANA. 28 jeltoqsan. QazAqparat /Qanat Mámetqazyuly/ - Búgingi teleekran osy zamannyń besik jyry ekenin umytpaýymyz kerek. QR Parlamenti Senatynyń jalpy otyrysynda «Teleradıo habarlaryn taratý týraly» zań jobasyn talqylaý barysynda senator Qýanysh Aıtahanov osylaı málimdedi.
«BAQ-ta, onyń ishinde qoǵam ómirinde jastardyń sana seziminiń durys qalyptasýyna, óskeleń urpaqty otansúıgishtikke, qazaqstandyq patrıotızmge tárbıeleýde otandyq telearnalardyń alatyn orny erekshe. Sol sebepti de qazaqstandyq telearnalardy qoldaý, retteý, qadaǵalaý, yntalandyrý máselelerin qarastyratyn zań jobasyn tolyǵymen qoldaımyn», - dedi senator Qýanysh Aıtahanov. Onyń aıtýynsha, sońǵy ýaqytta qazaqstandyq arnalarda teledıdar habarlaryn taratýdaǵy memlekettik tilge betburys oń sıpat alyp keledi. Degenmen, otandyq telearnalar jumysynda jastardy adamgershilikke, otansúıgishtik rýhta tárbıeleýde áli de bolsa kemshilikter barshylyq.
«Otandyq telearnalarda arzanqol jyltyraq shoýlar, oıyn-saýyq baǵdarlamalary kóbeıip barady. Qazirgi zamanǵa beıimdelýdiń joly osy eken dep batystyq, reseılik baǵdarlamalardy kóshirip alý kóptep oryn alýda. Kórermendi kóptep oılandyratyn, ǵıbraty mol baǵdarlamalar sany múldem az. «El bolamyn deseń besigińdi túze» degen uly M. Áýezovtyń danalyǵyna qazirgi aqparattyń sharyqtaý zamanynda «El bolamyn deseń ekranyńdy túze» degendi qosý kerek sekildi. Sebebi, búgingi ekran - osy zamannyń besik jyry. Muny esh umytpaýymyz kerek», - dedi Qýanysh Aıtahanuly.
Senatordyń aıtýynsha, kún saıyn tili shyǵa bastaǵan sábılerden bastap júzdegen-myńdaǵan adamdar teleekrannyń aldynda otyrýdy ádetke aınaldyrsa, olardyń kópshligi jat pıǵyldy, atys-shabys pen zorlyq-zombylyqqa toly qantógis fılmdermen «tárbıelenýde».
«Teleekrandy urpaq tárbıeleýde jastarymyzdyń kúsh-qýatyn táýelsiz elimizdiń azattyq rýhynda, qazaqstandyq patrıotızmge tárbıeleýde tolyq paıdalana almaı kele jatyrmyz», - dedi senator.
