Búgingi tarıh óziniń tar pándik sheńberinen shyǵyp, pánaralyq ǵylymǵa aınaldy - M.Tájın

ASTANA. 5 maýsym. QazAqparat - Búgingi tarıh óziniń tar pándik sheńberinen shyǵyp, pánaralyq ǵylymǵa aınalǵany anyq. Mundaı pikirdi búgin elordadaǵy L.Gýmılev atyndaǵy Eýrazııa ulttyq ýnıversıtetinde ótip jatqan Qazaqstan Respýblıkasynyń ulttyq tarıhyn zertteý jónindegi vedomstvoaralyq jumys tobynyń keńeıtilgen otyrysynda QR Memlekettik hatshysy Marat Tájın málim etti.

«Biz ýaqyt tarıh ǵylymynyń aldyna atymen jańa talaptar qoıyp otyrǵanyn aıqyn kórip, uǵynýǵa tıistimiz», - dep atap ótip Memlekettik hatshy álemdik tarıhnamada oryn alǵan tanym tásilderin synı turǵydan qaıta qaraý bizdiń nazarymyzdan tys qalyp qoıǵandyǵyn basa aıtty. «Áńgime, kem degende, HH ǵasyrdyń eki ádisnamalyq revolıýtsııasy jaıynda bolyp otyr, tarıh ǵylymyndaǵy qaǵıdatty ózgerister solarmen baılanysty. Birinshiden, men eń aldymen HH ǵasyrdyń birinshi jartysyndaǵy frantsýz tarıhı mektebiniń qýatty zııatkerlik qozǵalysyn atap aıtqym keledi, ol qozǵalys eń aldymen Lıýsen Fevr men Mark Bloktyń esimderimen baılanysty», - dedi.

M.Tájınniń paıymynsha, búgingi tarıh óziniń tar pándik sheńberinen shyǵyp, pánaralyq ǵylymǵa aınalǵany anyq. Tarıhı zertteýler óz boıyna kóptegen shektes pánderdiń - áleýmettaný men áleýmettik psıhologııanyń, makroekonomıkalyq teorııanyń, áleýmettik geografııanyń, etnografııanyń, antropologııanyń, mádenıettanýdyń, quqyq tarıhynyń jáne basqalarynyń ádisterin kiriktirdi.

«Ekinshiden, álemdik tarıh ǵylymynda aýqymy alǵashqydan kem túspeıtin taǵy bir sapalyq sekiris HH ǵasyrdyń ekinshi jartysynyń ózinde oryn aldy», - dedi ol.