Búgingi tańda birinshi kezektegi másele – turaqtylyqty qamtamasyz etý - senator

NUR-SULTAN. QazAqparat - Qazaqstan azamattaryn eldegi jaǵdaıǵa baılanysty sabyrǵa shaqyramyn. Memleket basshysynyń búgingi tańda qabyldap jatqan sharalary durys. Sebebi, qazir birinshi kezekte halyqty tynyshtandyrý kerek. Elimizde bolǵan tótenshe oqıǵalarǵa baılanysty senator Bekbolat Orynbekov osyndaı pikir bildirdi.

«Ókinishke qaraı búgingi tańda adam shyǵyndary da bolyp jatyr. Ol úshin marqumdardyń jaqyndaryna kóńil aıtamyn. Prezıdenttiń qabyldaǵan sharalary óziniń sheshimin taýyp kele jatyr. Biz osyndaı kezde Memleket basshysynyń janynda bolyp, atqarylyp jatqan jumystarǵa belsendi atsalysýymyz kerek», dep atap ótedi senator.

Sonymen qatar, depýtat Aqtaý qalasynda kóterilgen máselelerge tolyq baǵa berilgenin aıtty. «Suıytylǵan gazdyń baǵasy 50 tg-den 70 teńgege deıin bekitildi. Janar-jaǵarmaıǵa qatysty másele de sheshilip, 95 benzınniń bir lıtri 215 teńge, 92 benzın 186 teńge boldy. Memleket endi azyq-túlik baǵalasyn retteýge kirisedi. Bul jumystar óz nátıjesin beredi dep esepteımin. Bizge qazir Memlekettik basshysymen birge bolyp, Qazaqstanymyzdy qalpyna keltirý jumystaryna jumylýymyz kerek»,-dedi senator.