Búgingi tańda adam saýdasy álem boıynsha keń aýqym alyp otyr - S.Kúsetov
ALMATY. Sáýirdiń 29-y. QazAqparat /Ádilet Musahaev/ - Búgingi tańda adam saýdasy álem boıynsha keń aýqym alyp otyr, al Qazaqstan tiri taýardy jetkizýshi, tutynýshy jáne tranzıt eli retinde osy jahandyq úderistiń bel ortasynda qalýda. Bul jaıynda búgin QR ІІM krımınaldy polıtsııa komıtetiniń tóraǵasy Sultan Kúsetov «Balalar saýdasyna qarsy is-qımyl tetikteri» atty semınar-keńeste aıtty,
dep habarlaıdy QazAqparat.
S.Kúsetovtyń aıtýynsha, tiri taýardyń krımınaldyq saýdasyna ekonomıkalyq jaǵynan damyǵan elder men damýshy memleketter de tartylyp otyr.
«Bul jaǵymsyz qubylys birlesken shuǵyl is-qımyl men sheshýshi, ári jan-jaqty áreketti qajet etýde. Sondyqtan osy máseleni keńinen talqylap, ári kórshi eldermen tájirıbe almasyp, osy baǵytta mamandardyń kásibı deńgeıin kóterý men tıimdi tásilderdi izdeý maqsatynda - búgingi semınar-keńesti uıymdastyryp otyrmyz», deıdi S.Kúsetov.
Sonymen qatar ol ótken jyly 15-ten asa adam saýdasy oryn alǵanyn jáne bıylǵy jyldyń tek alǵashqy toqsanynda 10-nan asa osyndaı jaǵdaıdyń tirkelgenin jetkizdi.
Atalmysh semınarǵa QR Іshki ister mınıstrligi, UQK qyzmetkerleri, EQYU Ortalyǵynyń, BUU Balalar qory, Qazaqstandaǵy Halyqaralyq kóshi-qon uıymy, Qazaqstannyń úkimettik emes uıymdary, Ýkraına ІІM-niń, Reseı, Ózbekstan men Tájikstan memleketteriniń ÚEU-nyń ókilderi qatysýda.
Sáýirdiń 30-na deıin jalǵasatyn shara «Qazaqstan daǵdarys ortalyqtary odaǵy», Astana qalasyndaǵy EQYU Ortalyǵy, Qazaqstandaǵy kóshi-qon uıymy men Qazaqstan Respýblıkasyndaǵy AQSh elshiliginiń qoldaýymen uıymdastyrylyp otyr.
