Búgingi saılaýdyń máni men mańyzy durys túsindirildi - N. Ábiqaev
ASTANA. QazAqparat - Búgin QR Parlamenti Senatynyń depýtaty Nurtaı Ábiqaev elordadaǵy Oqýshylar saraıynda ornalasqan № 81-shi saılaý ýchaskesine kelip, daýys berdi.
«Búgin elimizde ótip jatqan Parlament Májilisiniń depýtattary men jergilikti máslıhatty saılaý týraly kóp aıtyldy jáne onyń máni men mańyzy túsindirildi. Besinshi shaqyrylymdaǵy Májilis óziniń tarıxı mıssııasyn oryndady. Atap aıtqanda, bes ınstıtýtsıonaldyq reformany tıimdi júzege asyrý turǵysynda qajetti qadam jasaldy. Meniń oıymsha, elimizdiń halqy damý jolyndaǵy sheshimdi durys qadam retinde qabyldady. Elbasymyz júrgizip otyrǵan saıasattyń arqasynda biz aldaǵy belesterdi senimdi túrde eńserip kelemiz. Sondyqtan osy saılaý maqsat-mindetterdi tıimdi oryndaýǵa jańa serpin beredi», - dedi depýtat.
Sonymen qatar ol óziniń otbasy músheleri Memleket basshysynyń saıasatyn qoldaıtynyn, sondaı-aq saılaýǵa baryp, mindetti túrde daýys beretinin atap ótti.
Jergilikti ýaqyt boıynsha tańǵy saǵat 7.00-den keshki saǵat 20.00-ge deıin 9840 saılaý ýchaskesinde daýys berý ótedi, munan bólek shetelde 65 saılaý ýchaskesi jumys isteıdi. Jalpy, 9 791 165 qazaqstandyq daýys berýshiler tizimine engizilgen.
Aıta keteıik, saıası dodaǵa barlyǵy alty partııa - «Nur Otan» partııasy, Qazaqstannyń «AQ JOL» demokratııalyq partııasy, «Aýyl» halyqtyq-demokratııalyq patrıottyq partııasy, Qazaqstan Kommýnıstik Halyq partııasy, Jalpyulttyq sotsıal-demokratııalyq partııasy jáne «Birlik» saıası partııasy qatysyp jatyr.
