Búgingi negizgi maqsatymyz memlekettik tildiń mártebesin nyǵaıta túsý jáne onyń qoldaný aıasyn keńeıtý - A.Jeldibaev
ALMATY. Qyrkúıektiń 28-i. QazAqparat /Ádilet Musahaev/ - Búgin Almaty qalasy Medeý aýdandyq ákimdiginde tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasyn talqylaýǵa arnalǵan dóńgelek ústel ótti.
Atalmysh aýdannyń ákimi Mahambet Beıdaly qazirgi tańda tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasy jobasy aıasynda elimizde jáne qalamyzdaǵy ár mekemelerde talqylaý jumystary júrip jatqandyǵyn aıtady. Sonymen qatar búgingi jıynǵa qazaq tiliniń naǵyz janashyrlary men onyń damýyna atsalysyp júrgen jandar kelgendigin jetkizdi.
Sondaı-aq jıyn barysynda Medeý aýdany ákiminiń apparaty mádenıet jáne tilderdi damytý bóliminiń bastyǵy Aqylbek Jeldibaev aýdan boıynsha qazaq tiliniń damý barysyna toqtalyp ótti.
"Búgingi negizgi maqsatymyz - memlekettik tildiń mártebesin nyǵaıta túsý jáne onyń qoldaný aıasyn keńeıtý. Memlekettik til eldi basqarý tili retindegi rólin tolyǵymen atqarýyna jan-jaqty jaǵdaı jasalǵan. Aýdanymyzdaǵy ákim apparatynda is-qujat aınalymynyń memlekettik tilge kóshýi tolyǵymen aıaqtaldy. Apparat qyzmetkerleriniń memlekettik tildi meńgerý deńgeıin jetildirý maqsatynda memlekettik tildi oqytý jolǵa qoıylǵan", deıdi A.Jeldibaev.
Sonymen qatar ol memlekettik tildi nasıhattaý men qoldaný aıasyn keńeıtý maqsatynda aýdanda ornalasqan mektepter men joǵary oqý oryndarynda ártúrli sharalar ótkizilip jatqandyǵyn jáne Qazaqstan halqy tilderi kúnin atap ótý maqsatynda til aptalyǵy uıymdastyrylǵanyn aıtady. "Sonymen birge qalalyq "Til daryny-2010", "Qazaq tiliniń úzdik oqytýshysy", "Memlekettik til - meniń tilim" baıqaýlaryna atsalystyq. Aýdandyq deńgeıde ótetin barlyq mádenı buqaralyq sharalar memlekettik tilde ótedi", dep atap ótti óz sózinde Aqylbek Jeldibaev.
Kórnekti aqparattar men jarnamalardyń QR-nyń til týraly zańynyń 21-shi babyna sáıkes ázirlenýin tekserý boıynsha aǵymdaǵy jylǵy sáýirdiń 26-30-sy men qyrkúıektiń 10-20-sy aralyqtarynda atalmysh aýdanda til tazalyǵy aptalyǵy ótken. Aptalyq barysynda aýdandaǵy negizgi kóshelerinde ornalasqan nysandarda berilgen jarnamalardaǵy qatelikter sýretke túsirilip, Almaty qalasy tilderdi damytý basqarmasyna jiberilgen.
