Búgingi kúni naýqas adamdardyń sany kóp, olardy kerekti dári-dármekpen qamtamasyz etken jón - B. Túmenova
ALMATY. 9 qarasha. QazAqparat /Ádilet Musahaev/ - Qoǵam ókilderi «jedel jeli» telefondarynyń jumysyn uıymdastyrý arqyly Qazaqstan azamattaryn kepildendirilgen dári-dármekpen qamsyzdandyrýdyń qoljetimdiligine baqylaý júrgizýge nıet bildirip otyr. Bul jaıynda búgin Almatyda arnaıy ótken baspasóz máslıhatynda aıtyldy.
Ótinishterdi qabyldaý Almaty, Qyzylorda, Qaraǵandy jáne Semeı qalalarynda júzege asyrylmaq.
Zertteý maqsaty tegin jáne jeńildikpen beriletin dári-dármekpen qamsyzdandyrý máselesin zertteý, sondaı-aq, osy máseleniń ashyqtyǵy men tıimdiligin arttyrý bolyp tabylady. Ótinishterdi qabyldaý jáne ony taldaýǵa kepildendirilgen dári-dármekpen qamsyzdandyrý úrdisine qoǵamdyq monıtorıng júrgizý jobasy aıasynda «Amansaýlyq» qoǵamdyq qory bastama berip otyr.
«2008 jyly «Soros-Qazaqstan» qorynyń qoldaýymen elimizdiń alty qalasynda alǵashqy ret uıymdastyrylǵan «jedel jeli» telefondarynyń jarty jyldyq jumysy nátıjesinde shaǵymdardyń 70 paıyzǵa jýyǵy kepildendirilgen dári-dármekpen qamsyzdandyrý máselesimen baılanysty bolǵandyǵyn ańǵartty. Ótinishterge taldaý jasaý tegin jáne jeńildik boıynsha jiberiletin dári-dármektiń qoljetimdilik deńgeıin baǵalap, biryńǵaı dıstrıbıýtordy engizý ýaqytynan bergi oryn alǵan ózgeristerdi baqylaýǵa múmkindik beredi», - deıdi «Amansaýlyq» QQ Prezıdenti Baqyt Túmenova.
Sonymen qatar osy joba aıasynda Shyǵys Qazaqstan men Qyzylorda oblystarynyń aýyldyq jerlerindegi naýqastardy tegin dári-dármekpen emdeý jumystary júrgizilmek.
B.Túmenovanyń aıtýynsha, Almaty qalasynyń dári-dármekpen qamtamasyz etilýi basqa aýmaqtarǵa qaraǵanda áldeqaıda táýir. "Al aýyldyq jerlerde jaǵdaı budan da nashar. Ol nelikten desek bólingen bıýdjet qarjysy jetkiliksiz. Meniń oıymsha negizinen osy bıýdjet bekitilgen kezde depýtattar, jergilikti ákimder birinshiden qalaǵa jol salýdy, ony árlendirýdi jáne taǵy basqa máseleni birinshi orynǵa qoımaı, adamdy, onyń densaýlyǵyn oılaý kerek. Búgingi kúni naýqas adamdardyń sany kóp, olardy kerekti dári-dármekpen qamtamasyz etken jón", -dep atap ótti óz sózinde B. Túmenova.
«Joba áleýmettik jeńildik aıasyndaǵy azamattarǵa tıesili dári-dármektiń qoljetimdiligin baqylaýǵa arnalǵan. Atalmysh qormen biz osymen ekinshi ret birlese jumys istemekshimiz. Joba bizge tegin dári-dármekpen qamtamasyz etýdi tıimdi júrgizýge múmkindik beredi», - deıdi QR DM Almaty qalalyq Medıtsınalyq jáne uıymdastyrylǵan baqylaý qyzmet komıteti departamentiniń dırektory qadyrbek Ańdaǵulov.
«Jedel jeli» telefondar qyzmetin uıymdastyrý «Soros-Qazaqstan» qorynyń «Memlekettik qorlar ashyqtyǵy» baǵdarlamasy sheńberinde qoldaý tapqan «Kepildendirilgen dári-dármekpen qamsyzdandyrý júıesiniń ashyqtyǵyn arttyrý jáne QR azamattarynyń dári-dármek quraldaryna qoljetimdiligin arttyrý» jobasynyń bir bóligi bolyp tabylady.
«Amansaýlyq» qoǵamdyq qory azamattardyń «jedel jeli» telefondaryna kelip túsetin ótinishterin qabyldaýdy Qyzylorda qalasynda «Jastar máseleleri ortalyǵy» qoǵamdyq birlestigimen, Qaraǵandy qalasynda «Bilim jáne damý» qoǵamdyq birlestigimen, Semeı qalasynda «Úı» qoǵamdyq birlestigimen áriptestik aıasynda júzege asyrmaq.
