Búgingi kúni qazaqtyń foto óneri damý ústinde - S. Qusaıynov
ALMATY. Jeltoqsannyń 10-y. QazAqparat /Ádilet Musahaev/ - «Qazaq halqy árqashanda óz óneriniń arqasynda ózge elderden erekshelenip otyrady. Sol sebepti qandaı da bolmasyn óner salasynyń órken jaıýyna sebepker bolý - bizder úshin úlken mártebe»,
deıdi belgili jas fotosýretshi Samat Qusaıynov QazAqparat tilshisine bergen suhbatynda.
Ol búgingi qalalyq murajaıda ótip jatqan kórmeniń ereksheligi, tek qana bir óner tóńireginde ǵana shektelip qalmaı, birneshe ónerdiń basy bir jerge toǵysyp otyrǵandyǵyn atap ótti. «Búgingi kúni qazaq foto óneri damý ústinde. Qazaq jeriniń ásem tabıǵaty men kórikti oryndaryn osy foto óneri arqyly álemge maqtan ete alamyz», deıdi jas fotosýretshi. Sondaı-aq ol kóptegen salalardyń qazaq sanasynda qaıta jańǵyrýyna táýelsizdiktiń qosqan úlesi zor ekendigin, sonyń aıǵaǵy retinde foto óneriniń de qaıta órkendep kele jatqandyǵyn basa aıtyp ótti. «Ótip jatqan óner báıgesi qanshama jastarymyzdyń bolashaǵyna jol ashý ústinde. Táýelsizdigimizdiń arqasynda mol muramyzben qaıta qaýyshý ústindemiz. Qazaq órkenıetiniń álemdik arenada atyn shyǵarý úshin bolashaqta qazaq jastarynyń aldyna qoıatyn eń alǵashqy mindeti - óz Otanyna degen patrıotızmdi joǵaltpaý. Ultty ósiretin de sol otansúıgishtik qasıet», deıdi S. Qusaıynov.
