Búgingi kúnge deıin 7-qysqy Azııa oıyndaryna qatysatyndyǵyn Azııanyń 27 elinen 1134 sportshy qýattady
ASTANA. 22 jeltoqsan. QazAqparat /Gúlmıra Álıakparova/ - 22 jeltoqsandaǵy jaǵdaı boıynsha Qazaqstanda ótetin 7-Qysqy Azııa oıyndaryna qatysatyndyǵyn Azııanyń 27 elinen 1134 sportshy men 534 resmı tulǵa qýattady.
Bul týraly Azıada oıyndaryn uıymdastyrý komıteti atqarýshy dırektsııasynan málim etti.
Buǵan deıin habarlanǵandaı, Qazaqstandaǵy Aq Azıadaǵa Azııa qurlyǵyna enetin 45 eldiń 31-i qatysady dep kútilýde. Ótinimderdi berý ýaqyty aıaqtalmaǵandyqtan, qatysýshylardyń sany kúnde ózgerip otyr.
Aıta keteıik, Qazaqstan Oıyndarǵa qatysatyn sportshylardyń sany jaǵynan alda tur. El namysyn 167 sportshy qorǵamaq.
2011 jylǵy 30 qańtar men 6 aqpan aralyǵynda ótetin Aq Azıadada sporttyń 11 túri boıynsha (konkımen júgirý, shaıbaly hokkeı (erler jáne áıelder arasynda), mánerlep syrǵanaý, tramplınnen shańǵymen sekirý, frıstaıl, dopty hokkeı boıynsha jarystar (bendı), taý shańǵysy sporty, shańǵy jarysy, bıatlon, shańǵymen qysqy sporttyq baǵdarlaý jáne short-trek) barlyǵy 69 jıyntyq medal sarapqa salynady.
Eske salaıyq, 2011 jyldyń 30 qańtar kúni keshki saǵat 18.00-de, Astanadaǵy «Astana-Arena» stadıonynda 7-shi qysqy Azııa oıyndary saltanatty túrde ashylyp, Oıyndardyń basty alaýy jaǵylady. Bir jetige sozylatyn baıraqty básekeden keıin, 6 aqpan kúni Oıyndar Almatydaǵy Balýan Sholaq atyndaǵy Sport saraıynda resmı túrde jabylady. 17.00-de bastalatyn saltanatty bul rásim eki saǵatqa sozylady dep kútilýde.
