Búgingi kúnge deıin 100-den astam aýyl ákimderi joǵary bilimsiz qyzmet etken
ASTANA. 1 shilde. QazAqparat - Búgingi kúnge deıin 100-den astam aýyl ákimderi joǵary bilimsiz qyzmet istegen.
Bul týraly búgin Ortalyq kommýnıkatsııalar qyzmetiniń brıfınginde QR Prezıdenti Ákimshiligi basshysynyń orynbasary Ǵabıdýlla Ábdirahymov málim etti.
Brıfıngte aýyl ákimderin saılaý naýqany jaıynda sóz órbitken Ǵabıdýlla Ábdirahymov, endi budan bylaı aýyl ákimderine qoıylatyn kásibı talaptardyń kúsheıgenin aıtty.
"Aýyl ákimderin saılaý naýqanynyń birneshe erekshelikteri bar. Bul saılaýda aýylǵa kásibı deńgeıi joǵary azamattar keledi dep senemiz. Oǵan zańdastyrylǵan jańa talaptar negiz bola alady. Onyń ishinde buryn aýyl ákimderi saıası qyzmetkerler edi, endi olar saılanatyn "B korpýsynyń" ákimshilik qyzmetkerleri bolady. Sonymen qatar úmitker Qazaqstan azamaty bolýy kerek, jasy 25-ten kem bolmaı, joǵary bilimi bolýy shart. Tıisti aýmaqta turatyn bolýy kerek. Memlekettik qyzmet týraly zańnamaǵa saı bolýy tekseriledi. Osyndaı talaptar aýyl ákimderiniń qajetti kásibı deńgeıin qamtamasyz etýge múmkindik beredi. Máselen, búgingi kúnge deıin 100-den astam aýyl ákimderi joǵary bilimsiz qyzmet istegen. Endi oǵan jol berilmeıdi", - dedi Ǵ. Ábdirahymov.
Onyń aıtýynsha, eger buryndary aýdan ákimderi aýyl ákimderin eshkimmen aqyldaspaı taǵaıyndasa, búgingi zańǵa sáıkes jergilikti halyqpen konsýltatsııalar ótkizýi tıis. Ony ótkizý orny men ýaqyty týraly aqparat quraldary arqyly habarlanady.
"Jergilikti ózin-ózi basqarý zańyna tıisti ózgerister engizildi. Elbasy ákimderdi saılaý týraly arnaıy Jarlyqqa qol qoıdy. Oblys ákimderiniń usynystaryna sáıkes, elimizde tamyz aıynda aýyl ákimderiniń saılaýy ótedi. Zańnamaǵa sáıkes, aýyl ákimderin aýdandyq máslıhattardyń depýtattary saılaıdy. Qazaqstanda 2457 aýyldyq ákimdikter bar", - dedi ol.
