Búgingi kıno arqyly qazaqtyń qyzy qorlyqtyń, masqaralaýdyń nysanyna iligip otyr - B. Tileýhan
ASTANA. Naýryzdyń 31-i. QazAqparat /Qanat Mámetqazyuly/ - Búgingi kıno arqyly qazaqtyń qyzy qorlyqtyń, masqaralaýdyń nysanyna iligip otyr.
QR Parlamenti Májilisiniń jalpy otyrysynda qazaqtyń qazirgi kınosyna qatysty pikirin osylaı bildirgen depýtat Bekbolat Tileýhan búgin osy salaǵa jaýapty mınıstrlik basshylary men laýazymdy tulǵalaryn Májiliske shaqyrý týraly másele kóterdi, dep habarlaıdy QazAqparat.
« Kıno arqyly memleketter, elder jaıynda túsinik, pikir qalyptasady. Kınosy arqyly AQSh álemdi bir qutqarýshy el sekildi rólge ense, úndi eli - syrshyl, mahabbatshyl keletinin tanımyz, aǵylshyndar - kerbez, Reseı - qaısar da ádiletti kórinedi. Kerek deseńiz, keıingi túsirgen Kolchak týraly fılmin qarasańyz, odan aıaýly adam joq. Al qazaq she? Qazaq «Kelin», «Qaırat-chempıon» sekildi kıno túsirip, eldi masqaralap otyr. Búgingi kınosyna qarasań qazaq - qyztekeler men «birjynystylyqpen buzylǵandardyń» eli sekildi. Byltyrǵy Táýelsizdik sekildi kıeli merekeniń qarsańynda jurt kóretin ýaqytta el dúrligip jatqanyna qaramastan KTK-telearnasy «Kelin» fılmin qaıta-qaıta kórsetip jiberip edi. Bul ultty qorlaýdyń ashyq taıtalasy, basyný, oıyna kelgenin isteý, degen sóz bolatyn. Al endi Naýryz merekesiniń qarsańynda Almaty, Astana kóshelerinde attyń artyna mingesken qazaqtyń qyzynyń bóten ult erkeginiń qushaǵynda balqyp otyrǵan sýret-jarnamasy ár qadam saıyn ilindi («Mahabbat tálgegi» fılminiń jarnamasy» - red.). Nege bizdiń kıeli merekelerimiz Táýelsizdik kúni, Ulystyń uly kúni- Naýryz tap osylaı jarnamalanbaıdy? Al endi sol jarnamadaǵy «Mahabbat tálkegi» degen kınony kórseńiz janyńyz taǵy da shyjǵyrylady. Qazaqtyń qyzy eýropalyq jigitke jabysyp, óz ultynyń jigitinen qashyp, sol bóten ult jigitiniń odan bezgenine qaramaı, izine túsedi. Bundaıǵa paryqsyz kórermen kúlse, namysy bar jigitter kıno alańynda jylarman boldy», dedi B. Tileýhan.
Sonymen birge, depýtat bunda eshqandaı da kezdeısoqtyqtyń oryn almaǵanyn, qaıta mynadaı sumpaıylyqtyń ult sanasyn ýlaıtyn zańdylyqqa aınalyp otyrǵanyn atap ótti.
«Bundaı soraqy kıno halyqtyń salyǵynan, bıýdjet esebinen túsirilgen kıno. Jalpy, qazaqtyń tanymynda, kóshpelilerdiń uǵymynda qorlaýdyń, kek alýdyń, masqaralaýdyń eń shyńyna jetken túri - bul qyzdyń qorlanýy bolatyn. Búgingi kıno arqyly qazaqtyń qyzy qorlaýdyń nysanyna iligip otyr. Qazaqtyń qyzyn qorlaǵannan basqa taqyryp taýsylyp qalǵandaı, týra osy tóńirekti aınalshyqtap otyrmyz. Osyǵan baılanysty, Mádenıet mınıstrligi jurtshylyqtyń salyǵynan túsiriletin kınolarǵa, olardyń mazmunyna jaýap berýi tıis. Kim túsirip jatqany, qalaı túsirilip jatqany jaıynda Mádenıet mınıstri men qazaqtyń kıno salasyna jaýapty azamattardy Májiliske shaqyrý kerek», dedi B. Tileýhan.
