«Búgingi Qazaqstan budan 15 jyl burynǵydan múldem basqa el» - BAQ-qa sholý
***
Keshe Aqordada Elbasy Nursultan Nazarbaev Qazaqstanda tirkelgen sheteldik dıplomatııalyq mıssııalar basshylarymen kezdesti. Kezdesýge sheteldik elshilermen qatar, Prezıdent Ákimshiliginiń, Syrtqy ister mınıstrliginiń jaýapty qyzmetkerleri, dıplomattar, saıasatkerler qatysty. Osy jaıt arqaý bolǵan maqala «Egemen Qazaqstan» gazetinde «Búgingi Qazaqstan budan 15 jyl burynǵydan múldem basqa el» degen taqyryppen jaryq kórdi. Basylymnyń atap ótýinshe, alqaly jıyn barysynda N.Nazarbaev Almaty qalasynda Óńirlik kópjaqty dıplomatııa ortalyǵyn qurý jónindegi jumystardyń bastalǵany týraly habarlady. «Onda uıymdardyń, baǵdarlamalardyń, qorlardyń jáne Birikken Ulttar Uıymynyń mamandandyrylǵan mekemeleriniń óńirlik jáne sýbóńirlik mártebege ıe 16 ókildigi jumys jasaıdy. Qazir Halyqaralyq damýǵa járdemdesý jónindegi agenttik (KAZAID) qurý jumystary júrip jatyr. Ol bizdiń kórshilerimizge jáne ózge memleketterge tehnıkalyq kómek kórsetetin bolady. Jalpy, biz Eýrazııanyń júregi turaqty óńirlik jáne jahandyq damýmen úndesip, onyń ıgiligi jolynda birqalypty soǵýy úshin ózimizge baılanysty nárseniń bárin jasaımyz», dedi Memleket basshysy.
Osy basylymnyń jazýynsha, Premer-Mınıstr S.Ahmetov pen Prezıdent Ákimshiliginiń Basshysy K.Másimov Mańǵystaý oblysynda bolyp, oblystyq máslıhattyń kezekten tys sessııasyna qatysty jáne oblys aktıvimen kezdesti. Sapar men kezdesý maqsaty - Elbasy N.Nazarbaevtyń Jarlyǵymen taǵaıyndalǵan oblystyń jańa ákimi A.Aıdarbaevty tanystyrý. «Men úshin Mańǵystaýdyń orny bólek. Osynda qarapaıym munaıshylyqtan bastap, búgingi kúnge jettim. 362 áýlıeniń, Pir Beket atanyń mekenine qyzmet etý - úlken paryz, abyroı. Maǵan senim artqan Elbasyna alǵys aıtyp, bar tájirıbem men kúshimdi senimdi aqtaýǵa jumsaıtyn bolamyn», - depti óńirdiń jańa basshysy.
***
«Aıqyn» gazetiniń jazýynsha, kommertsııalyq bankterden nesıe alýǵa barǵandar ózine qajet somaǵa qol jetkizý barysynda bir etek teńgeni tek qana komıssııalyq salyqqa tóleıtini belgili. Bank qyzmetkerleriniń aıtýynsha, bul nesıe berý týraly qujattardy daıyndaǵandary úshin alynatyn alym. Olardy nesıeniń paıyzdyq syıaqy mólsherlemesimen qosqanda, alǵan qaryzyńyzdyń ósimaqysy kóterilip shyǵa keledi. Mine osy másele egjeı-tegjeıli kóterilgen maqala «Nesıege nemketti qaraýǵa bolmaıdy» degen taqyryppen berilgen. «Ulttyq bank osyndaı aqylǵa qonymsyz «sypyra» qarpyp qalý úshin jasap alǵan bankterdiń nesıe alýshylarǵa salatyn salyqtaryna zańdy túrde toqtaý qoımaq. UB tóraǵasynyń orynbasary Danııar Aqyshev «Aqjol» partııasy uıymdastyrǵan dóńgelek ústeldiń tutynýshylar quqyqtaryn qorǵaý týraly bóliminde ekinshi deńgeıli bankterdiń turǵyndarǵa nesıe berer kezde alatyn kez kelgen komıssııalary men tólemderine zańdy túrde tyıym salý múmkindigin qarastyrýdy usynyp otyrǵandaryn málimdedi», - dep jazady basylym.
«Qolyna oıynshyq ustap, oınamaıtyn bala joq shyǵar, sirá. Balalyq shaqtyń eń qyzyqty dáýreni oıynshyqtarmen ótetini ámbege aıan. Ádemi qýyrshaq, zyryldaǵan mashına - búgingi balanyń basty ermegi. Áıtkenmen, sońǵy ýaqytta oıynshyqtardyń sapasy syn kótermeıdi. Tipti elimizde óndiriletin oıynshyqtardyń 90 paıyzy talapqa saı kelmeıdi eken», - dep jazady «Aıqyn» gazeti senbilik sanyndaǵy «Oıynshyq nege oı salmaıdy» degen taqyryptaǵy maqalasynda. Basylymnyń alǵa tartqan derekterine qaraǵanda, ótken jyldyń aıaǵynda Indýstrııa jáne jańa tehnologııalar mınıstrliginiń Tehnıkalyq retteý jáne metrologııa komıteti oıynshyq shyǵarýmen aınalysatyn 84 kásiporyndy tekserdi. Nátıjesinde 75 kásiporynnyń ónimi talapqa saı kelmegen. Bul óz kezeginde oıynshyq óndirisiniń 90 paıyzy kóńil kónshitpeıtinin bildirse kerek. 33 mıllıon teńge kóleminde 1003 oıynshyq toptamasy tárkilenip, 4 mıllıon teńgelik aıyppul salyndy
***
«Keshe Memleket basshysy Nursultan Nazarbaev Túrkııanyń Saýda palatasy jáne taýarlar bırjasy odaǵynyń prezıdenti Rıfat Hısarchıklyoǵlyny qabyldady», - dep jazady «Kazahstanskaıa pravda» gazeti. Kezdesýde eki eldiń saýda-ekonomıkalyq jáne ınvestıtsııalyq yntymaqtastyǵyn tereńdetý jáne damytý máselesi talqylandy. «Sizder joǵary deńgeıge kóterilgen Qazaqstan men Túrkııa arasyndaǵy qarym-qatynasqa zor mańyz berip otyrǵanymyzdy bilesizder. Meniń Túrkııaǵa ótken jylǵy saparym kezinde birqatar máseleler jóninde ýaǵdalastyqqa qol jetkizildi. Endi olardy oryndaý mańyzdy. Sondaı-aq olardy iske asyrýdyń negizgi baǵyttaryn talqylaý jónindegi jumysty jalǵastyrý qajet dep sanaımyn», - dedi Qazaqstan Prezıdenti. R.Hısarchıklyoǵly óz kezeginde N.Nazarbaevqa qabyldaǵany úshin alǵysyn aıtty jáne óziniń Qazaqstanǵa bul sapary eki eldiń isker toptarynyń yntymaqtastyǵyn odan ári nyǵaıtýǵa baǵyttalǵanyn atap ótti.
