Búgingi beıbitshiliktiń qadirin jete túsinýimiz qajet - N. Nazarbaev

ASTANA. 9 mamyr. QazAqparat - Búgingi beıbitshiliktiń qadirin jete túsinýimiz qajet. Bul týraly búgin Uly Jeńis kúnine oraı Astanadaǵy Otan qorǵaýshylar monýmentine gúl shoqtaryn qoıǵannan keıin BAQ ókilderine suhbat bergen Elbasy Nursultan Nazarbaev aıtty.

Bul soǵysta Keńes Odaǵynan 25-26 mln. adam qaza tapqandyǵyn atap ótken Memleket basshysy: «Sondyqtan mynaý beıbitshiliktiń qadirin qazir jaqsy túsinýmiz kerek»,-dedi.

QR Prezıdentiniń paıymynsha, bizdiń ata-babalarymyz Uly Otan soǵysynda erliktiń, birliktiń zor tájirıbesin kórsetti.

«Eger bizdiń babalarymyz sol Jeńiske qol jetkizbegen bolsa, biz búgingi táýelsizdikti kórer me edik, kórmes pe edik? Sony qadirleı bilýimiz kerek»,-dedi Elbasy.

Sondaı-aq, Elbasy ardagerlerge árqashan qamqor bolý qajettigin atap ótip, bul isten memlekettiń de tysqary qalmaıtyndyǵyn basa aıtty.

«Elimiz aman, jurtymyz tynysh bolsyn. Ár ýaqytta halqymyzda baqyt, bereke, birlik bolsyn dep tileımin»,-dedi Memleket basshysy.