Búgingi aktsııa barysynda respýblıka boıynsha 600 myńnan astam aǵash otyrǵyzý josparlanǵan
ASTANA. QazAqparat - Búgin Qazaqstanda Qorshaǵan orta jáne sý resýrstary mınıstrligi men «Ornyqty damý» Jer Qory» qoǵamdyq uıymy uıymdastyrǵan «Ulttyq orman otyrǵyzý kúni» atty respýblıkalyq ekologııalyq aktsııasy ótip jatyr. Bul týraly QR QOSRM baspasóz qyzmetinen habarlandy.
Aktsııaǵa memlekettik organdar men jeke kásiporyndardyń jumyskerleri, úkimettik emes, qoǵamdyq jáne jastar uıymdarynyń ókilderi qatysýda. Olarǵa tabıǵatty qorǵaý uıymdary men memlekettik orman ıelenýshi kásiporyndardyń mamandary kómek kórsetti.
Astanadaǵy aktsııa búkil qalalyq senbilikpen qatar júrgizildi. Oǵan Qorshaǵan orta jáne sý resýrstary mınıstri Nurlan Qapparov pen vedomstvonyń 200 jýyq qyzmetkeri qatysty.
«Búgingi aktsııaǵa 100 myńnan astam qazaqstandyq qatysady. Respýblıka boıynsha 600 myńnan astam aǵash otyrǵyzylmaq. 2012 jyly «Rıo+20» sammıtinde álemde 2017 jylǵa deıin 100 mıllıon aǵash otyrǵyzý bastamasy qoldaý tapqan bolatyn. Búgingi aktsııany ótkizip, biz osy bastamaǵa is júzinde qosylyp otyrmyz»,- dep N. Qapparov qazaqstandyqtardy osy ekologııalyq sharaǵa belsendilikpen qatysýǵa shaqyrdy.
Sonymen qatar mınıstr Almaty turǵyndarynyń daýyl saldarynan zardap shekken Іle Alataýy memlekettik ulttyq tabıǵı parki aýmaǵynda Shrenk shyrshasynyń 10 myń kóshetin otyrǵyzǵandyǵyn málimdedi.
Aıta keteıik, Qazaqstandaǵy orman qorynyń jalpy aýdany 28 mln. 786 myń gektar nemese el aýmaǵynyń 10,6 paıyzyn alyp otyr. Aǵash ósken alqaptar 12 mln. 452 myń gektar, ıaǵnı orman qory jerleriniń aýdanynyń 43,3 paıyzyn quraıdy.
