Búginde úkimettik emes sektor bılikpen birge jumys isteıtin azamattyq qoǵamnyń ajyramas bóligine aınaldy-M. Qul-Muhammed

ASTANA. 10 qarasha. QazAqparat /Aıdar Ospanalıev/ - Búginde úkimettik emes sektor bılikpen birge jumys isteıtin azamattyq qoǵamnyń ajyramas bóligine aınaldy. Bul pikirdi Astanada ótip jatqan QR Úkimeti janyndaǵy Úkimettik emes uıymdarmen birlesken qımyldar jónindegi úılestirý keńesiniń otyrysynda Mádenıet mınıstri Muhtar Qul-Muhammed aıtty.

"Búginde úkimettik emes sektor bılikpen birge jumys isteıtin azamattyq qoǵamnyń ajyramas bóligine aınaldy. Buǵan, árıne, elimizdiń zańnamasyn jetildirý, áleýmettik áriptestik týraly, áleýmettik tapsyrys týraly sııaqty jańa zańdardyń qabyldanýy úlken áserin tıgizdi. Sonyń negizinde qazir elimizde azamattyq sektordy memleketpen birigip jumys isteıtin, qoǵamdyq-saıası ómirde ózindik orny bar sala deýge tolyq negiz bar», - dep atap kórsetti M.Qul-Muhammed.

Onyń sózine qaraǵanda, elimiz táýelsizdigin alǵannan keıin azamattyq sektor qalyptasty deýge tolyq negiz bar. Táýelsizdiktiń alǵashqy jyldarynda memlekettik emes uıymdar sheteldegi túrli qarjylyq toptar men áleýmettik, saıası kúshterdiń yqpalymen qurylyp jatty. «Al qazirgi tańda úkimettik emes sektordy jetildirý Elbasynyń udaıy nazary men kóńil bólip otyrýynyń arqasynda damýda», - dedi mınıstr.

Atalmysh sharaǵa Prezıdent Ákimshiliginiń jáne mınıstrlikter men vedomstvolar ókilderi qatysýda. Ol búgin elordada ótkizilgen Respýblıkalyq áleýmettik ıdeıalar jármeńkesiniń aıasynda uıymdastyrylýda. Osyǵan qaraı jıynǵa qatysýshylar elimizdegi úkimettik emes sektordy damytý jáne olardyń ómirine qatysty qalyptasqan máseleler jóninde ózara pikir almasýda.