Búginde sport salasyn bilikti kadrlarmen tolyqtyryp, buqaralyq sportty barynsha nasıhattaý qajet - Týrızm jáne sport mınıstrligi
ASTANA. Sáýirdiń 19-y. QazAqparat /Rýslan Ǵabbasov/ - Búginde sport salasyn bilikti kadrlarmen tolyqtyryp, buqaralyq sportty barynsha nasıhattaý qajet.
Bul týraly búgin Astanada buqaralyq dene shynyqtyrý men sport máselelerine arnalǵan halyqaralyq ǵylymı-tájirıbelik konferentsııa barysynda QR Týrızm jáne sport mınıstrligi Sport komıtetiniń tóraǵasy Elsııar Qanaǵatov málim etti, dep habarlaıdy QazAqparat.
Komıtet basshysynyń sózine qaraǵanda, búginde elimizdiń aldyńǵy qatarly jattyqtyrýshylarynyń kópshiligi úlken jasqa jetip qalǵan, al olardy aýystyratyn kadrlar jetispeıdi. Atap aıtqanda, dene shynyqtyrý jáne sport oqý oryndary túlekteriniń daıyndyq deńgeıi qazirgi zamanǵy talaptarǵa saı emes.
Bul máseleni sheshý úshin oqytý júıesin qaıta qurý kerek ekenin jetkizgen ol, «dene shynyqtyrý jáne sport jónindegi memlekettik ınstıtýt quryp, jumysqa bilikti oqytýshylar men jattyqtyrýshylardy tartyp, oqytýshylyq quramnyń biliktiligin arttyratyn turaqty júıeni qurý kerek. Sondaı-aq balalar jattyqtyrýshylarynyń eńbekaqysyn joǵarylatý ózekti máselelerdiń biri sanalady», - dedi.
Sonymen birge E. Qanaǵatov salaýatty ómir saltyn nasıhattaý tıisti deńgeıde emes ekenin aıtyp ótti.
«Bul problemany sheshý turǵysynda kórermender aýdıtorııasynyń aýqymdylyǵyn eskere otyryp telearnalarǵa erekshe ról tıesili. Búginde ókinishke qaraı respýblıkalyq arnalar dene shynyqtyrý men sportty tıisti deńgeıde nasıhattamaı otyr», - dedi komıtet basshysy.
