Búginde revolıýtsııalar óńin ózgertip, ulttyq, dinı, mádenı, separatıstik perde jamyldy - Nazarbaev
ASTANA. QazAqparat - «Egemen Qazaqstan» respýblıkalyq gazetinde jarııalanǵan «Bolashaqqa baǵdar: rýhanı jańǵyrý» atty maqalasynda QR Prezıdenti Nursultan Nazarbaev búgingi zamanda revolıýtsııalyq emes, evolıýtsııalyq damý ǵana ulttyń órkendeýine múmkindik beretindigin jáne qazaqstandyq qoǵam tarıhtan sabaq alý qajettigin atap ótti, dep habarlaıdy QazAqparat.
«Bıyl Eýrazııa qurlyǵynyń ulan-ǵaıyr aýmaǵyn astań-kesteń etken 1917 jyldyń qazan aıyndaǵy oqıǵaǵa 100 jyl tolady. Kúlli HH ǵasyr revolıýtsııalyq silkinisterge toly boldy. Bul osy aýmaqtaǵy barsha ulttarǵa meılinshe áser etip, búkil bolmysyn ózgertti. Árbir jurt tarıhtan ózinshe taǵylym alady, bul - árkimniń óz erkindegi sharýa. Bireýge ózińniń kózqarasyńdy eriksiz tańýǵa eshqashan bolmaıdy. Bizge tarıh týraly ózderiniń sýbektıvti paıymdaryn tyqpalaýǵa da eshkimniń qaqysy joq. Ótken HH ǵasyr halqymyz úshin qasiretke toly, zobalań da zulmat ǵasyr boldy», - dep jazady Prezıdent atalmysh maqalada.
Birinshiden, Elbasynyń aıtýynsha, ulttyq damýdyń yqylym zamannan jalǵasyp kele jatqan ózimizge ǵana tán joly birjola kúıretilip, qoǵamdyq qurylymnyń bizge jat úlgisi eriksiz tańyldy. Ekinshiden, ultymyzǵa adam aıtqysyz demografııalyq soqqy jasaldy. Onyń jarasy bir ǵasyrdan beri áli jazylmaı keledi. Úshinshiden, qazaqtyń tili men mádenıeti qurdymǵa kete jazdady. Tórtinshiden, elimizdiń kóptegen óńirleri ekologııalyq apat aımaqtaryna aınaldy.
Prezıdent tarıh tek aqtańdaqtardan turmaıtyndyǵyn da atap ótedi.
«HH ǵasyr Qazaqstanǵa birqatar ıgilikterin de berdi. Indýstrııalandyrýdy, áleýmettik jáne óndiristik ınfraqurylymdardyń qurylýyn, jańa ıntellıgentsııanyń qalyptasýyn osyǵan jatqyzýǵa bolady. Bul kezeńde elimizde belgili bir jańǵyrý boldy. Biraq, bul - ulttyń emes, aýmaqtyń jańǵyrýy edi. Biz tarıhtyń sabaǵyn aıqyn túsinýimiz kerek. Revolıýtsııalar dáýiri áli bitken joq. Tek onyń formasy men mazmuny túbegeıli ózgerdi», - dep atap ótedi Memleket basshysy.
Maqalada aıtylǵandaı, Qazaqstannyń keshegi tarıhy bultartpas bir aqıqatqa - evolıýtsııalyq damý ǵana ulttyń órkendeýine múmkindik beretinine kózimizdi jetkizdi. Budan sabaq ala bilmesek, taǵy da tarıhtyń temir qaqpanyna túsetindigimizdi de eskertedi. Endeshe, evolıýtsııalyq damý qaǵıdasy árbir qazaqstandyqtyń jeke basynyń derbes baǵdaryna aınalýǵa tıis, deıdi Elbasy.
«Biraq, qoǵamnyń evolıýtsııalyq damýy qaǵıda retinde máńgi tumshalanýdyń sınonımi emes. Sol sebepti, tarıhtyń aşy sabaǵyn túsinip qana qoımaı, ózimiz kúnde kórip júrgen qazirgi qubylystardan oı túıip, bolashaqtyń betalysyna qarap, paıym jasaı bilý de aıryqsha mańyzdy. Búginde revolıýtsııalar óńin ózgertip, ulttyq, dinı, mádenı, separatıstik perde jamyldy. Biraq, bári de, túptep kelgende, qantógispen, ekonomıkalyq kúıreýmen aıaqtalatynyn kórip otyrmyz. Sondyqtan, álemdegi oqıǵalardy oı eleginen ótkizip, qorytyndy jasaý - qoǵamnyń da, saıası partııalar men qozǵalystardyń da, bilim berý júıesiniń de aýqymdy dúnıetanymdyq, rýhanı jumysynyń bir bóligi», - dep túıdi oıyn Prezıdent.
