Búginde respýblıkada 9,8 mln. tonna astyq bastyryldy - QR Aýyl sharýashylyǵy mınıstrligi

ASTANA. 17 qyrkúıek. QazAqparat - Qazaqstanda ústimizdegi jyldyń 17 qyrkúıegindegi jaǵdaı boıynsha aýyl sharýashylyǵy taýarlaryn óndirýshiler 8,2 mln. gektar aýmaqta astyqty jınady, bul elimizdegi barlyq egis alqaptarynyń jartysynan astamyn quraıdy, dep habarlady primeminister.kz saıty Aýyl sharýashylyǵy mınıstrligine silteme jasap.

«Respýblıkanyń barlyq óńirlerinde jańa astyqty jınaý júrgizilýde. Oblystyq aýyl sharýashylyǵy basqarmalarynyń málimeti boıynsha 2013 jyldyń 17 qyrkúıegine aýyl sharýashylyq taýarlaryn óndirýshiler 8262,7 myń gektardyń astyǵyn jınap aldy, bul oblystardyń egis alqaptarynyń 52,4 paıyzynquraıdy», - delingen habarlamada.

Budan ózge, jedel málimet boıynsha búgingi tańda 9,8 mln. tonna astyq bastyryldy. Oǵan qosa ortasha ónimdilik bir gektardan 11,9 tsentnerdi qurady. 2012 jyly ortasha ónimdilik bir gektardan 8,4 tsentner deńgeıinde bolǵanyn aıta ketken jón.

Jalpy alǵanda, oblystyq basqarmalardyń málimetinshe, qazirgi ýaqytta Jambyl oblysynda aýyl sharýashylyǵy daqyldarynyń 100 paıyzy jınaldy, al Batys Qazaqstan oblysynda bul kórsetkish - 88,6 paıyz, Ońtústik Qazaqstan oblysynda - 86 paıyz deńgeıinde.