Búginde qurylystyń basym bóligi memlekettiń kómegimen iske asyrylýda - S. Nokın

ASTANA. 9 qarasha. QazAqparat /Rýslan Ǵabbasov/ - Búginde qurylystyń basym bóligi memlekettiń kómegimen iske asyrylyp otyr. Bul týraly búgin Astanada ótken «Qazaqstandaǵy qol jetimdi turǵyn úı - qol jetimdi ıpoteka: qalpyna keltirý baǵyttary» taqyrybyndaǵy dóńgelek ústelde QR Qurylys jáne turǵyn úı kommýnaldyq sharýashylyq isteri agenttiginiń tóraǵasy Serik Nokın málim etti.

«Ókinishke qaraı Qazaqstanda turǵyn úıdiń jetpeýi úrdisi saqtalýda. Bul birinshi kezekte qurylys sektoryna baǵyttalǵan ınvestıtsııanyń qysqarýyna, qurylys qarqynynyń báseńdeýine, sondaı-aq halyqtyń úı-jaı alýǵa negizdelgen qol jetimdi tetikterdiń jetispeýine baılanysty bolyp otyr», -dedi agenttik basshysy.

Onyń sózine qaraǵanda, QR Statıstıka agenttiginiń málimeti boıynsha, 2010 jyldyń basynda elimizdiń turǵyn úı qory 270,9 mln. sharshy metr jalpy aýdandy quraıdy. Onyń ishinde 38 paıyzy 50 jyl buryn salynǵan úıler, sondaı-aq 32 paıyz kóp páterli úı tolyq jóndeýdi qajet etedi. Respýblıka boıynsha ınfraqurylymnyń tozýy 70 paıyzdy qurap otyr. Búginde qurylystyń basym bóligi memlekettiń kómegimen iske asyrylatynyn aıtqan ol, 2012 jylǵa jeke ınvestıtsııalar esebinen jańa qurylystardy júrgizýde tirkeýde turǵandardyń sany joqtyń qasy ekenin jetkizdi. Eger qajetti sharalar ýaqytyly qabyldanbasa, onda 2012 jyly 2,5 mln. sharshy metrge deıin turǵyn úı qurylysy kóleminiń kúrt tómendeýi oryn almaq. Atap aıtqanda, ótken jyldary 6 mln. sharshy metrden astam turǵyn úı paıdalýǵa berilgen bolatyn.