Búginde Qazaqstannyń Túrkııa, Malaızııa jáne Eýropanyń Shyǵys memleketteriniń barlyǵymen de terezesi teń - QR Prezıdenti
Bul týraly búgin elordadaǵy «Saryarqa» velotreginde ótip jatqan «Jas Otan» jastar qanatynyń ІІ sezinde Elbasy Nursultan Nazarbaev málim etti.
«Osy, qazirgi kúnderge jetý úshin bizdiń býyn, senderdiń ákeleriń, atalaryń kóp ter tókti. Eldiń syrtyn jaýdan, eldiń ishin daýdan aman qylý úshin kúndiz-túni tymbaı jumys istedik. Óıtpesek memleket bolmas edik. Qarańdarshy, sol tynymsyz eńbektiń arqasynda biz qazir kim boldyq? Adam basyna shaqqanda jalpy ishki ónimimiz 16 ese ósip, ár adamǵa 12 myń dollarǵa jetti. Bul degenińiz bizdiń Túrkııamen de, Malaızııamen de, Eýropanyń Shyǵys memleketteriniń barlyǵymen de terezemiz teń boldy degen sóz. Qaı kezde qazaq osyny armandaýshy edi?», - dedi QR Prezıdenti óz sózinde.
Bul rette Memleket basshysy Qazaqqa Allanyń bergen baılyǵy jerdiń astynda da, ústinde de mol ekendigin basa aıtty.
«Ol bizge qajet, kerek. Biraq ol bir kezderde taýsylady. Ony basqa elderden kórip otyrmyz. Tek qana munaı, gaz, temirmen baı, uly memleket bolyp otyrǵan el joq. Ol basqasha bolady. Sondyqtan, meniń qolǵa alyp otyrǵan Indýstrıaldy baǵdarlamasy olardan basqa, ekinshi ekonomıka qurýǵa negizdelgen, onsyz bolashaǵymyz múshkil bolady», - dep basa aıtqan Elbasy, búgingi zamanǵa saı zaýyt, fabrıkalar, búgingi zamanǵa saı ınfraqurylymdar qurýdyń ózektiligin erekshe atap ótti.
