Búginde qazaqstandyq velosport óte nashar jaǵdaıda - Valentın Rehert
ALMATY. Sáýirdiń 13-i. QazAqparat /Názıra Eleýhan/ - Qazirgi kúnde velosıped sportynyń jaǵdaıy óte nashar.
Bul týraly búgin Almatyda jýrnalıstermen ótken arnaıy kezdesý barysynda QR Velosport federatsııasynyń Bas hatshysy Valentın Rehert málimdedi, dep habarlaıdy QazAqparat.
Jańa qyzmetine kiriskenine 1 aı bolǵan jańa hatshy ótken jyly Velosport federatsııasy jasaǵan baıandamadaǵy: «barlyq oblysta velosport jaqsy damyǵan, 3,5 myń lıtsenzııalyq sportshylar bar, daıyndaý quramynda 200 jattyqtyrýshy qyzmet jasaıdy» degen málimetterdi joqqa shyǵardy. Ol «búgingi kúni velosport barlyq oblysta emes, 3-4 oblysta - Astana qalasy, Soltústik Qazaqstan, Almaty, Shymkent, Qyzylorda oblystary men jańadan ashylǵan Taldyqorǵan mektepteri, sondaı-aq jańa damý ústindegi Pavlodar oblysynda ǵana qolǵa alynǵan. Sportshylardyń sany sanaýly, jattyqtyrýshylar kóp bolsa 30-daı ǵana», dedi.
Ol sonymen qatar, «jattyqtyrýshylardyń jalaqysy 20-30 myń teńge ekenin aıta kele, olardyń jaǵdaıy túzelmeı, velosporttyń jaǵdaıy qalaı kóterilmek», dep qynjylysyn bildirdi.
«Qazaqstan velosportynyń úlken tarıhı áleýeti boldy. Biraq, biz sońǵy jyldary ony joǵaltyp aldyq. 90-shy jyldary velosport quldyrap ketken bolatyn, sol jyldarda biz kóptegen sheber jattyqtyrýshylarymyz ben sportshylarymyzdan aıyryldyq. Biri bızneske, biri ár túrli salaǵa ketti. Búginde olardyń 3-4-eýi qaldy. Velosport bıýdjeti 4,5 mıllıon teńgege azaıyp, ol komandanyń jartylaı daıyndalýyna ǵana jetýde. D. Ahmetovtyń kelýimen velosport qaıta jandanyp, materıaldyq jaǵdaıymyz túzelip edi, biraq ol jaǵdaı uzaqqa sozylmady. Biz aldaǵy ýaqytta jańa velosport júıesin jasap, «Astana» komandasy men Qazaqstandaǵy velosportty damytýdy, ásirese jasóspirimder arasynda velosportty damytýdy qolǵa alýdy josparlap otyrmyz», dep atap ótti Valentın Rehert.
