Búginde Qazaqstanda birde-bir polıomıelıt oqıǵasy tirkelgen joq - Bas sanıtarlyq dáriger
ASTANA. Mamyrdyń 17-si. QazAqparat /Rýslan Ǵabbasov/ - Búginde Qazaqstanda birde-bir polıomıelıt oqıǵasy tirkelgen joq. Bul týraly búgin Astanada ótken brıfıngte QR Densaýlyq saqtaý mınıstrliginiń Memlekettik sanıtarlyq-epıdemıologııalyq baqylaý komıtetiniń tóraǵasy Keńes Ospanov málim etti,
dep habarlaıdy QazAqparat.
Aıta keteıik, Qazaqstanda 1995 jyldan beri polıomıelıt ınfektsııasy tirkelmegen.
«Atap aıtqanda, bul derttiń oshaǵy Tájikstanda tirkeldi. Osy elde qazirgi kezde aýqymdy jumystar júrgizilýde. Sondaı-aq Reseıde aýrýdyń syrttan kelgen eki oqıǵasy anyqtaldy», dedi ol.
Budan buryn habarlanǵandaı, Dúnıejúzilik densaýlyq saqtaý uıymynyń málimeti boıynsha, jyl basynan beri Tájikstanda polıomıelıttiń 278 klınıkalyq oqıǵasy tirkeldi. Onyń 13-de adam shyǵyny oryn aldy.
«Bul elde qazir Dúnıejúzilik densaýlyq saqtaý uıymynyń jáne basqa da halyqaralyq uıymdardyń kómegimen 1 mıllıon 100 myń balaǵa dári egildi»,-dedi elimizdiń bas sanıtarlyq dárigeri.
K. Ospanovtyń aıtýynsha, búginde atalǵan ınfektsııalyq dertke qarsy vaktsına elimizde jetkilikti.
Mınıstrliktiń baspasóz qyzmetiniń málimeti boıynsha, bul derttiń aldyn alýǵa qatysty arnaıy shtab qurylǵan. Sondaı-aq Qazaqstan shekarasyndaǵy ótkizý beketterinde 15 jasqa deıingi balalarda polıomıelıtke qarsy vaktsınalardyń egilýleri týraly sertıfıkattardy tekserý jáne egilý sertıfıkaty joq balalardy odan ári halyqaralyq áýejaılar men temirjol vokzaldarynyń medıtsınalyq pýnkterinde vaktsınalaý qolǵa alynǵan. Ásirese, Tájikstannan kelgen adamdarǵa sanıtarlyq-karantındik baqylaý kúsheıtilgen.
